Sharra, përfundojnë punimet e fazës së parë

Kanë përfunduar punimet për fazën e parë të rehabilitimit të landfillit të Sharrës, njërës nga zonat më të ndotura të kryeqytetit. Tanimë po punohet për fazën e dytë, ndërsa sipas drejtuesve të Bashkisë së Tiranës, aktiviteti i depozitimit të mbeturinave urbane të kryeqytetit po kryhet në një parcelë moderne. "Tashmë mbetjet urbane në qytetin e Tiranës po trajtohen në fushën e Sharrës sipas kushteve të Komunitetit Evropian. I gjithë aktiviteti që zhvillohet në këtë fushë është transferuar që nga mesi i shtatorit në parcelën e re", është shprehur kryebashkiaku Edi Rama gjatë prezantimit të investimeve të parashikuara për vitin 2009 në njësinë bashkiake nr.6 në Kombinat. Sipas drejtuesve të bashkisë, me mbarimin e parcelës së parë është realizuar rrethimi me rrjetë metalike dhe portë hyrjeje me qëllim ndalimin e hyrjes aty të personave të paautorizuar apo kafshëve, si dhe shmangien e shkarkimit ilegal të mbetjeve. Është përfunduar gjithashtu dhe montimi i tubacioneve, ndërtimi i rrjetit të grumbullimit të ujërave që vijnë nga reshjet atmosferike, si dhe ndriçimi me tre prozhektorë i parcelës. Së shpejti, do të vendoset një vaskë grumbullimi me vëllim rreth 10 mijë metra kub, e cila do të shërbejë për grumbullimin e shllamit.

Në fazën fillestare, hedhja e mbeturinave në parcelën e parë u realizua me asistencën teknike të specialistëve italianë, të cilët i shpjeguan personelit të fushës, jo vetëm mënyrën e depozitimit, por dhe atë të mbulimit të shtresave të mbeturinave kur ato arrijnë një kuotë të caktuar.

Dërgimi i mbetjeve në parcelën e parë realizohet me makina vetëshkarkuese me dy dhe tre akse. Mbetjet shtrihen me fadromën me zinxhir dhe ngjishen, proces ky i cili nevojitet për të pakësuar vëllimin e zënë nga to. Kur arrihet kuota e caktuar e lartësisë së mbetjeve dhe shkalla e duhur e ngjeshjes së tyre, realizohet mbulimi i mbetjeve me një shtresë dheu.

Aktualisht ka filluar puna në parcelën e dytë në fushën e Sharrës. Në këtë fushë, po zbatohet një projekt prej 4.6 milionë eurosh nga qeveria italiane, që synon të kontrollojë situatën mjedisore në këtë vend grumbullimi të mbeturinave urbane.