Shetitje me zetor, vdesin moter e vella

SHKODER- Gjyshi nxjerr shetitje me zetor ne rruget e fshatit nipin dhe mbesen, por aksidenti tragjik u merr jeten dy femijeve moter dhe vella. Ngjarja tragjike ka ndodhur dje ne mesdite ne fshatin Sheldi, te komunes Guri i Zi ne Shkoder, kurse policia shoqeroi dhe mori ne pyetje te moshuarin, qe me pas u la i lire per shkak te gjendjes se renduar psikologjike. Burime zyrtare, thane se viktimat jane D. Trushi dhe K. Trushi, 8 dhe 10 vjec, te cilet humben jeten per shkak te plageve te renda, kurse nen akuze eshte marre 62-vjecari Kol Trushi, per vepren e “shkeljes se rregullave te qarkullimit rrugor”.
Policia e Shkodres, sqaroi se ngjarja ka qene aksidentale, pasi mjeti i tipit zetor, te cilin familja Trushi e kishte blere per te kryer pune bujqesie, ka dale nga rruga dhe eshte permbysur. Sipas rrefimit te gjyshit te dy femijeve, ai i eshte pergjigjur kerkeses se tyre per t’i nxjerre nje shetitje me mjetin e tij ne rruget e fshatit Sheldi. Ndersa kane nisur te udhetojne, pas disa minutash mjeti ka dale nga rruga kryesore si pasoje e humbjes se kontrollit nga i moshuari Kol Trushi. Grupi hetimor dyshon edhe per ndonje defekt ne mjetin e rende, sistemi mekanik i te cilit nuk i eshte pergjigjur drejtuesit dhe eshte permbysur menjehere jashte rruge.
Pas ngjarjes jane mbledhur banore te fshatit qe i kane dhene ndihmen e pare te aksidentuarve, por per dy vogelushet 8 dhe 10 vjec, vella e moter, ka qene e kote. Mesohet se vete gjyshi i viktimave ka pesuar lendime. Policia vendore sqaroi se permbysja e mjetit ka qene tragjike, pasi i ka zene femijet nen vete dhe per shkak te moshes dhe plageve i ka demtuar rende. Policia dyshon se defekti apo dalja e rimorkios se zetorit nga rruga, mund te jene shkaqet e ngjarjes tragjike, ndersa pritet te perfundoje edhe ekspertiza e plote.