Shiu, shtohen prurjet në lumin Drin

Si çdo e keqe që e ka një të mirë, moti i keq që ka përfshirë dje vendin, ka sjellë edhe pasojat e veta pozitive, duke shtuar nivelin e ujit në liqenet e hidrocentraleve të mëdhenj.

24 orët e fundit janë karakterizuar nga presioni i ulët atmosferik dhe reshje të dendura shiu edhe në zonën verilindore të vendit. Vetëm gjatë natës së të dielës dhe në paraditen e ditës së djeshme, në Kukës janë regjistruar 80 mm shi, një sasi e barabartë reshjet e muajit të fundit, ndërsa temperaturat mesatare kanë qenë nga 4 deri në 9 gradë. Reshjet e shiut kanë përfshirë të gjithë zonën deri në lartësinë 1000 m mbi det, kurse në lartësitë mbi 1000 m ka pasur reshje dëbore. Shërbimi sinoptik i Forcave Ajrore në Kukës tregon se edhe ditët e ardhshme të javës do të karakterizohen nga reshje shiu dhe dëbore të shkrirë.

Shiu i ditëve të fundit në zonat e Kukësit, Maqedonisë dhe Kosovës ka sjellë dyfishimin e prurjeve të ujit në lumin Drin. Sipas burimeve nga Hidrocentrali i Fierzës, niveli i liqenit ndodhet në kuotën 283,2 mbi nivelin e detit, ndërsa prurjet mbi 1100 metra kub në sekondë. Me vazhdimin e reshjeve sasia e prurjeve sa vjen e rritet, duke rritur edhe kotën e liqenit me më shumë se 50 cm në ditë, ndërsa hidrocentralet në kaskadën e Drinit punojnë me kapacitet normal. Nga ana tjetër, situata e rrugëve dhe qarkullimit të mjeteve në të gjithë Qarkun e Kukësit për akset kombëtare si Tiranë-Kukës, Kukës-Krumë, Kukës-Prizren etj., paraqitet normale. Vështirësi paraqesin prej ditësh një numër komunash të zonave të thella si Arrën, Zapod dhe Grykë Çajë të Kukësit apo Lekbibaj të Tropojës, ku trashësia e borës shkon deri në 50 cm. Por edhe për këto zona autoritetet thonë se kemi të bëjmë me situatë normale, ku lëvizja dhe furnizimi bëhen me kafshë pune.

SSSASS