Shkeljet, Këshilli "shkarkon" prokurorin e Kurbinit Tom Deda

 

Tirane - Këshilli i Prokurorisë së Përgjithshme votoi dje me unanimitet shkarkimin nga detyra të prokurorit të Kurbinit Tom Deda. Vendimi është marrë dje nga shumica e anëtarëve të Këshillit, i cili në katër mbledhje radhazi muajt e fundit dështoi të arrinte një rezultat për shkak të mungesës së vetë prokurorit ndaj të cilit u zhvillua procedimi disiplinor. Burime zyrtare nga Prokuroria e Përgjithshme thanë dje se shumica e anëtarëve të Këshillit të Prokurorisë, votuan dje në favor të shkarkimit nga detyra për prokurorin e Kurbinit Tom Deda. prej katër mbledhjesh procedimi disiplinor i tij ka qenë në rendin e ditës, ndërsa vendimi është shtyrë për shkak se oficerët e dërguar nga Prokuroria e Përgjithshme nuk kanë arritur t'i dorëzojnë thirrjen për pjesëmarrje në mbledhje prokurorit në fjalë. Nga ana e tij, në një deklaratë publike, prokurori Tom Deda e ka konsideruar procesin ndaj tij të paligjshëm, ndërsa ka thënë se nuk është njoftuar asnjëherë për të marrë pjesë në mbledhjet e Këshillit të Prokurorisë. Javën që shkoi, ky Këshill është mbledhur dhe në lidhje me procedimin ndaj Tom Dedës, vendosi të shtyjë vendimmarrjen për ditën e djeshme. Sipas burimeve nga Këshilli, edhe ditën e djeshme është pritur paraqitja e prokurorit për të dhënë kundërshtimet e tij në lidhje me kontrollin e ushtruar, i cili pretendohet se ka gjetur dosje të pushuara e të pezulluara, të cilat janë hetuar nga Tom Deda. Kontrolli është bërë në fillim të këtij viti nga një grup i dërguar prej Prokurorisë së Përgjithshme. Ata pretenduan se në dosjet e prokurorit Tom Deda ka pasur probleme me pezullime dhe pushime gjatë fazës së hetimit, si dhe me masat e dënimit gjatë fazës së gjykimit. Vetë prokurori e ka cilësuar procesin tendencioz, duke thënë se procedimi është fals derisa ai ishte pezulluar nga detyra në një kohë kur Këshilli nuk kishte marrë ende një vendim zyrtar.              tr.so