Shkodër, të rinjtë pastrojnë zonat turistike në breg të liqenit

Mbi 300 nxënës të shkollave të mesme të qytetit të Shkodrës dhe banorë të dy pikave turistike në breg të liqenit, Shirokë e Zogaj, u përfshinë dje në një aksion pastrimi nga Ura e Bunës në Zogaj, duke grumbulluar rreth 5 ton mbeturina. Aksioni u organizua në prag të hapjes së sezonit turistik në këto pika turistike, shumë të frekuentuar nga vizitorët vendas dhe të huaj, si pjesë e nismës Përgjegjësia për mbrojtjen apo shkatërrimin e mjedisit fillon nga shtëpia jonë e Qendrës Rajonale të Mjedisit, (REC), një nismë që përfshin mirëmenaxhimin e mbetjeve urbane dhe mirëmbajtjen e mjediseve të qytetit. Nisma e REC u mbështet nga bashkia e Shkodrës dhe Inter-Cooperation dhe përfshiu pastrimin e dy zonave turistike, Shirokë dhe Zogaj, shumë pranë qytetit të Shkodrës. Diana Bejko, drejtuese e Qendrës Rajonale të Mjedisit në Shkodër, tha se aksioni për pastrimin e mbeturinave të mjedisit ka nisur prej 10 ditësh, por sot pjesëmarrja e aktorëve ishte më e madhe. Gjatë ditës së djeshme u pastruan mbetje të mëdha, një pjesë e të cilave urbane të grumbulluara aty prej vitesh. Puna e nxënësve u mbështet nga mjetet e ndërmarrjes së menaxhimit të mbeturinave në bashki. Krahas pastrimit të brigjeve të liqenit të Shkodrës, REC e Shkodrës ka pajisur me infrastrukturën e nevojshme dy pikat turistike të Shirokës dhe Zogajt, për të kontribuar në përmirësimin e situatës. Në këto dy zona u vendosën  12 kazanë 1100 litërsh për mbajtjen pastër të zonës në periudhën në vazhdim, pasi pushues të shumtë frekuentojnë këto zona. Ndërkohë, është rënë dakord që ndërmarrja e menaxhimit të mbeturinave pranë bashkisë Shkodër të bëjë çdo ditë tërheqjen e mbeturinave të grumbulluara gjatë ditës. REC ka shpërndarë për biznesin e zonës mbi 300 fletëpalosje me informacion për mbajtjen pastër të mjedisit.