Shqipëri-Azerbajxhan diskutime për linjë direkte fluturimi Tiranë-Baku
Shqipëria dhe Azerbajxhani janë në diskutime për krijimin e një linje direkte fluturimi Baku-Tiranë. Diskutimet u zhvilluan në takimin e Komitetit të Përbashkët midis Shqipërisë dhe Azerbajxhanit që u zhvillua në Tiranë.
Zëvendëskryeministrja Belinda Balluku tha se transporti ishte një fushë e përbashkët interesi për zhvillimin dhe rritjen e bashkëpunimit.
“Ndërkohë duhet pasur parasysh që një tjetër fushë interesi midis dy vendeve tona është ajo e transportit, duke vënë një fokus kryesor në transportin e aviacionit civil. Pra, aviacioni civil ishte nga çështjet që diskutuam sot pasi një linjë direkte midis dy vendeve tona, midis dy kryeqyteteve Baku dhe Tiranës është një kërkesë e të dyja qeverive”, tha Balluku.
Ky takim vjen edhe ne kuadër të 30 vjetorit të marrëdhënieve diplomatike mes dy vendeve. Diskutimet u fokusuan edhe rritjen e bashkëpunimit të zhvillimeve ekonomike, teknologjike dhe atyre industriale.
Gazifikimi dhe ndërtimi i rrjetit të furnizimit të brendshëm me gaz të Shqipërisë ishte një tjetër projekt madhor që do të ketë impakt të madh në ekonominë shqiptare dhe do të bëhet me mbështetjen e Azerbajxhanit.
“Fusha energjetike është ajo që ka interesin më të madh midis dy palëve, duke patur parasysh projektet e rëndësishme që kemi, si gazifikimi i Korçës apo ekspansioni i konsorciumit TAP, gazi i lëngshëm në portin e Triportit të Vlorës dhe shumë projekte të tjera të rëndësishme që ne prej kohësh i kemi komunikuar me publikun.
Por, nga ana tjetër edhe në fushën e agrikulturës, por edhe në fushën e edukimit dhe të kulturës u diskutuan gjatë të gjitha mënyrat sesi mund të bashkëpunojmë nga shkëmbimi i eksperiencave dhe deri tek mbështetja e ndërsjellët midis dy vendeve”, tha Balluku.
/rtsh.al/