“Shqipëria, një ndër 3 vendet me rritjen më të madhe ekonomike në botë”

Kryeministri Sali Berisha përuron rrugën e re në Prezë dhe prezanton projektin e “Ndërtimit të Shqipërisë”

Kryeministri Sali Berisha shprehet edhe njëherë më nota pozitive për rritjen ekonomike të vendit, duke deklaruar se ekonomia shqiptare renditet ndër 3-4 vendet me nivelin më progresist. Në fjalën e tij para banorëve të komunës Prezë, pas inaugurimit të rrugës që e lidh atë me rrugën kombëtare, shefi i ekzekutivit vlerësoi rritjen ekonomike gjatë 2009-ës në kulmin e krizës globale, ndërsa u shpreh me optimizëm për një rritje edhe më të madhe gjatë këtij viti.

“Viti 2009 ka qenë viti i një krize botërore nga më të thellat në historinë e njerëzimit. Këtë vit, siç e keni dëgjuar, shumica e vendeve të Europës jo vetëm që nuk shënuan rritje ekonomike, por zbritën nën zero, deri në minus 8 për qind. Në këtë vit, shumica e vendeve jo vetëm që nuk rritën pagat dhe pensionet, por u detyruan t’i ulin ato nga 6 deri në 14 për qind, madje u detyruan t’i ulin jo vetëm një herë, por në mjaft raste edhe dy herë. Kjo nuk ndodhi në Shqipëri, sepse Shqipëria ka përcaktuar kushtet më të favorshme për biznesin në Europë, taksat më të ulëta. Kjo nuk ndodhi në Shqipëri, sepse Shqipëria mbi shpatullat tuaja, mbi shpatullat e taksapaguesve shqiptarë ka vendosur ka barrën më të lehtë burokratike. Sot, ne kemi një administratë që juve ju kushton, apo ju e paguani 50 për qind më pak, sesa taksapaguesit e vendeve përreth dhe kjo, jo se ne nuk e paguajmë administratën, pasi sot, ne e paguajmë administratën 30 për qind më shumë edhe sesa disa vende anëtare të Bashkimit Europian si Bullgaria apo Rumania, por kjo, sepse ne kemi shkurtuar në mënyrë drastike shpenzimet e tepërta të administratës. Sikundër kemi shkurtuar administratën, vetëm e vetëm, që barra e saj të mos ju përkulë juve. Ne e kapërcyem me sukses të madh dhe mbetëm një nga 3-4 vendet në botë për rritjen ekonomike të ndjeshme, sepse ne, siç ju jeni dëshmitarë, e kemi shndërruar vendin në një kantier”, deklaroi kryeministri.

Duke iu referuar ndërtimit të infrastrukturës dhe projekteve madhore të qeverisë, Berisha tha se në të katër anët, Shqipëria është në rindërtim dhe ndërtim.

“Gjatë këtij viti, ne do të inaugurojmë fillimin e punimeve në qindra e mijëra kilometra rrugë në të katër anët e vendit, rrugën e Arbrit, autostradën Tiranë-Elbasan, segmentin e Boshtit të Jugut Berat-Tepelenë, vazhdojnë punimet në Korçë-Qafë Plloçë dhe qindra e mijëra kilometra rrugë rurale. Ne do të vazhdojmë projektin tonë dhe ky projekt është ai i ndryshimit vendimtar të Shqipërisë, e shndërrimit të saj në një vend të vërtetë europian, është projekti me të cilin shqiptarët do ta ndjejnë veten qytetarë europianë, së pari, me heqjen e vizave brenda këtij viti, siç është premtuar, me rritjen e vazhdueshme të rrogave e pensioneve, në ndërtimin e infrastrukturës më moderne në rajon e më gjerë, me zhvillimin më tej të potencialeve të mëdha të vendit, potencialeve ujore, turistike, minerare. Shqipëria turistike do të jetë Shqipëria e shërbimeve më të mira për turistët nga mbarë bota. Shqipëria europiane do të jetë Shqipëria e arsimit modern, e shëndetësisë moderne, do të jetë Shqipëria, në të cilën qytetarët e saj do ta ndjejnë veten gjithnjë e më krenarë”, tha Berisha.

Kreu i qeverisë e cilësoi përurim e rrugës që lidh Prezën me aksin kombëtarë, si “fillimin e punimeve të një prej rrugëve turistike më të bukura të Shqipërisë, që do të shtojë me shpejtësi vizitorët nga Tirana, Shqipëria dhe bota në këtë komunë. Ne inaugurojmë fillimin e punimeve të njërës prej rrugëve turistike më të bukura të Shqipërisë, e cila do të mund të shtojë me shpejtësi vizitorët nga Tirana, Shqipëria dhe mbarë bota në komunën tuaj. Ky është një projekt i vërtetë turistik me 3.7 kilometra rrugë, investim prej 176 milion lekë. Rruga do të jetë me gjerësi 4-5 metra, me trotuare dhe ndriçim në tërë gjatësinë e saj. Preza, dikur fortesë e paepur, sot, me këtë rrugë, shndërrohet në një bizhu të vërtetë turistike për banorët e saj, për qytetarët e Tiranës, qytetarët shqiptarë dhe të mbarë botës. Qeveria ka porositur që rruga të jetë në lartësinë e bukurive të mëdha që ka Preza dhe qendra juaj. Projektuesi dhe investitori Fondi Shqiptar i Zhvillimit nuk kanë kursyer asgjë për të hartuar një projekt ndër më të bukurit në Shqipëri”, u shpreh Berisha.

Punimet e kësaj rruge me gjatësi 3,7 km do të përfundojnë pas 8 muajsh.

Lidhur me proceset e integrimit të Shqipërisë në Bashkimin Evropian, kryeministri Berisha u ndal tek liberalizimi i vizave.

Shefi i ekzekutivit garanton të gjithë shqiptarët se heqja e vizave do të realizohet sipas premtimit të qeverisë demokratike. “Do të mbajmë premtimin tonë për heqjen e vizave për të gjithë qytetarët shqiptarë brenda vitit të parë të mandatit të dytë qeverisës”, deklaroi më tej kryeministri Berisha.