Shqyrtimi i dosjeve te pronave brenda nje viti e gjysme

Ministria e Drejtësisë parashikon shqyrtimin total të 6500 dosjeve të ish pronareve që gjenden në Agjencinë e Kthimit dhe Kompensimit të Pronave brenda një vit e gjysmë. Komisioni i Ligjeve miratoi me votat e mazhorancës, ndryshimet në ligjin për kthimin dhe kompensimin e pronave, së bashku me amendamentet e kërkuara nga deputeti Enkelejd Alibeaj. Në ndryshime përfshihet edhe propozimi i ministrisë së linjës, për shtyrjen e e afatiti të funksionimit të Agjencisë, deri në prill të vitit 2014.

I pranishëm, në komision ministri i Drejtësisë, Eduard Halimi deklaroi se strategjia e re, që pritet të hartohet do të japë zgjidhje në mënyrën e duhur për subjektet e ishpronësuara. 
Sipas ministrit Halimi, vlera e kompensimit do të jetë sipas standardeve kombëtare, që bazohen në tre kompnentë përbërës së pronës.

Më herët, komisioni i ligjeve miratoi në parim pr/ligjin për hetimin e akuzave të bëra nga Dick Martin. Qeveria i propozoi Kuvendit që ky p/ligj të kalohet me procedurë të përshpejtuar. 

Deputetët e opozitës në Komision e cilësuan ligjin si mjaft të rëndësishëm, por kërkuan kohë për miratimin e tij. Megjithatë ata  ranë dakord ta miratojnë parimisht draftin, për vetë rëndësinë që ai paraqet dhe që lidhen me imazhin e Shqipërisë.

Drafti i paraqitur në komision nga ministri i Drejtësisë, Eduard Halimi, i njeh misionit EULEX në Kosovë, autoritetin për të zhvilluar hetime edhe në Shqipëri lidhur me akuzat e përfshira në raportin e relatorit të Këshillit të Europës, Dick Marti, për një trafik të mundshëm organesh të zhvilluar nga UÇK në fund të viteve '90, edhe në territorin shqiptar.