Shtatori, Berisha shtyn ndryshimet radikale në qeveri
E gjithë axhenda politike, sipas PD-së, do të përqendrohet në dosmodoshmërinë e bashkëpunimit me opozitën, me qëllim miratimin e ligjeve me shumicë të cilësuar, reforma zgjedhore si dhe zgjedhjen e disa krerëve të institucioneve në vend.
TIRANË Muaji shtator pritet i nxehtë për politikën, por nuk do të jetë i tillë për zhvillimet brenda mazhorancës. I gjithë aksioni i saj do të përqendrohet në raportet me opozitën, kërkesën për ngritjen e komisionit për reformën zgjedhore si dhe negociatat për të zgjedhur Avokatin e Popullit. Me pak fjalë, kryeministri Sali Berisha nuk do të ketë në vëmendjen e tij (të paktën për muajin shtator) ndryshimet radikale në qeveri, aq shumë të përfolura nga politika shqiptare. As kritikat e nënkryetarit të Kuvendit të Shqipërisë, Vangjel Tavo, për punën e dobët të ministrit të Shëndetësisë, Petrit Vasili, dhe as ndonjë zë i veçuar brenda grupit parlamentar të PD-së për të ndryshuar sa më shpejt përbërjen e qeverisë nuk do të jenë në fokusin e kreut të ekzekutivit. “Qeveria nuk është perfekte”,- u shpreh pak kohë më parë kryetari i grupit parlamentar të PD-së, Astrit Patozi, edhe pse i njohu kësaj qeverie disa merita, të cilat duket se qarkullojnë si një zë i vetëm në lidershipin e lartë të kësaj partie. Burime nga PD-ja deklaruan dje për gazetën “Mapo” se ndryshimet e diskutuara për në muajin shtator do të shtyhen për një periudhë të mëvonshme, atëherë kur të jenë mbyllur edhe negociatat vjetore me BE-në lidhur me statusin e vendit kandidat për Shqipërinë. E gjithë axhenda politike, sipas PD-së, do të përqendrohet në dosmodoshmërinë e bashkëpunimit me opozitën, me qëllim miratimin e ligjeve me shumicë të cilësuar, reforma zgjedhore si dhe zgjedhjen e disa krerëve të institucioneve në vend. Një lëvizje e tillë e mëvonshme u la të kuptohet edhe nga vetë kryeministri Sali Berisha. Në fund të muajit korrik, në mënyrë krejt të beftë, Berisha i çoi Presidentit të Republikës vetëm emrat për dy vendet vakante në qeveri. Eduard Halimi dhe Aldo Bumçi u votuan më pas në Kuvend në mungesë të dy deputetëve, që i përkasin partive aleate, Vangjel Tavo dhe Shpëtim Idrizi, të cilët aspirojnë jo pak për të qenë pjesë e qeverisë në nivel ministror. Ndërkohë, një tjetër çështje e hapur mbetet ajo me Ilir Metën. Seanca e radhës për këtë të fundit është parashikuar në javën e dytë të muajit shtator në Gjykatën e Lartë, një proces i cili do të zgjasë jo pak, nisur nga ecuria e deritanishme. Procesi gjyqësor ka filluar prej pak javësh, ndërsa vetë Meta hoqi dorë nga kërkesa e avokatëve të tij për ta mbyllur gjyqin për paligjshmëri, duke kërkuar zbardhjen e plotë të akuzave të ngritura nga Dritan Prifti, e të materializuara nga video-përgjimi i realizuar prej tij. Ky proces i mbetur pezull është një arsye më shumë për vetë kryeministrin Berisha që të mos nxitohet në emërimet e tij, që do të konsiderohen të fundit deri në zgjedhjet parlamentare të vitit 2013. Nga ana e tij, kryetari i LSI-së, Ilir Meta, e ka lënë të hapur mundësinë për një ripërfshirje në qeveri. I pyetur disa herë për këtë çështje, Meta ka shmangur përgjigjen direkte, duke theksuar se imediate për këtë parti mbetet riorganizimi i saj. Një etapë kjo jo aq e rëndësishme në fakt sesa vetë sheshimi i debateve, që kanë lindur brenda kësaj partie për llokmat që secili prej klaneve kërkon të përfitojë në qeveri në emër të katër votave “të arta” që ata kanë në Kuvend.
N.P