Shtohet dinamika e fushatës presidenciale në SHBA

Kur vetëm dy ditë na ndajnë nga zgjedhjet, kandidati demokrat për president Barak Obama dhe rivali i tij republikan, Xhon Mekein, po e vazhdojnë fushatën në shtetet ku gara zhvillohet tepër e ngushtë, që janë edhe më të rëndësishme për betejën presidenciale.

Senatori Obama ndodhet në Ohajo për të marrë pjesë në një numër aktivitetesh. Ndërsa senatori Mekein po zhvillon garë në Pensilvani.

Mekein                  Obama

Shteti i Ohajos dhe i Pensilvanisë së bashku, kanë 15 për qind të 270 votave elektorale, të nevojshme për të siguruar fitoren e presidentit të ardhshëm. Anketimet kombëtare tregojnë se zoti Obama vazhdon të kryesojë garën, megjithëse gara në disa shtete kyçe po zhvillohet tepër e ngushtë. Një anketë e përbashkët e agjencive Rojters, televizionit C-Span dhe organizatës së anketimeve Zogby, zoti Obama udhëheq me 6 për qind garën me zotin Mekein. Zoti Mekein ishte të shtunën i ftuar në komedinë televizive "Saturday Night live”, ku ai bëri shaka në lidhje me fushatën e tij dhe mbi planin e tij më të fundit për të siguar sa më shumë vota. Ai po ashtu bëri shaka, duke thënë se mund të fillojë strategjinë e një rebeli të tërbuar, i cili bën çfarë t'i thonë njerëzit.

Në takimet e mëparshme me zgjedhësit në Virxhinia dhe në Pensilvani, zoti Mekein premtoi se nuk do t'i rrisë më tej taksat, do të krijojë vende pune dhe do të fuqizojë ekonominë në recesion. Ndërsa zoti Obama, në takimet e tij në Nevada, Kolorado dhe Mizuri, po ashtu do të përqëndrohet tek ekonomia, duke u zotuar se do të ulë taksat për familjet e punonjësve dhe se do të përpiqet për ta kthyer ekonominë amerikane në periudhën e para recesionit. 

Anketimet tregojnë se gjendja aktuale e ekonomisë e ka ndihmuar zotin Obama të kryesojë garën me zotin Mekein. Shumica e të anketuarve besojnë se zoti Obama është më i aftë se rivali i tij përsa i përket trajtimit të gjendjes aktuale ekonomike.  //mm//