Sigurimet, dëmet e paguara bien me 19.7%
Kompanitë e sigurimeve kanë paguar më pak dëme për muajt e parë të këtij viti, krahasuar me të njëjtën periudhë të një viti më parë. Rënia e dëmeve të paguara shkon në rreth 19.7 për qind, në një kohë që aktiviteti sigurues ka njohur një rritje të ndjeshme. Gjatë periudhës Janar - Shkurt 2008 tregu i sigurimeve ka patur një rritje në masën 19.71% në krahasim me periudhën Janar - Shkurt 2007. Volumi i primeve, sipas të dhënave të Autoritetit të Mbikëqyrjes Financiare është rritur me 157,498 mijë lekë dhe kap shifrën 956,569 mijë lekë. Kjo rritje është ndikuar nga rritja e volumit të primeve të shkruara bruto në portofolin e Përgjegjësive ndaj Palëve të Treta Motorik në masën 46.59%. Numri i kontratave është rritur me 15, 816.
***
Kompanitë e Sigurimit të Jetës, duke patur parasysh edhe pjesën e vogël të tregut që zënë, kanë patur një numër më të vogël dëmesh gjatë periudhës Janar-Shkurt të këtij viti. Gjatë kësaj periudhe, kompanitë e Jetës kanë paguar një numër prej 7 dëmesh, ndërsa numri i dëmeve të paguara është rritur me 107 dhe kap shifrën 1,569, nga të cilat 1,562 dëme janë paguar nga shoqëritë e Sigurimit të Jo-Jetës. Rritja e tregut të sigurimeve gjatë 2 viteve të fundit ka qenë një fenomen i vazhdueshëm. Rimet e kësaj rritjeje janë të shpejta, por duke u nisur nga mbulimi ende i ulët që sigurimet zënë në shkallë vendi, krahasimi me vende të tjera na rendit sërish nga të fundit. Ritmet e rritjes së tregut të sigurimeve në vend janë përfshirë edhe nga disa investime të huaja në këtë treg, që kanë sjellë disa emra të njohur të kësaj fushe në Shqipëri.