Siria dhe Libia, vatra lufte- vazhdojnë përplasjet e armatosura mes rebelëve dhe forcave ushtarake

Të paktën 22 civilë u vranë nga të shtënat me armë të forcave të sigurisë në Hama, qytet në veri të Sirisë i rrethuar prej disa ditësh nga ushtria. Këtë njoftim bëri sot kreu i Organizatës Kombëtare për të Drejtat e Njeriut, Amar Qorabi.

“Të paktën 22 persona janë vrarë në Hama dhe mbi 80 të tjerë janë plagosur, disa prej tyre në gjendje të rëndë”- theksoi Qorabi në një deklaratë për mediat.

Ndërkohë sipas mediave ndërkombëtare të plagosurit janë dërguar në dy spitalet e qytetit Hama.

“Amnesty International”, në një raport denoncon dhunën në Siri

“Amnesty International”, në një raport ka denoncuar dhunën në Siri.
Për organizatën e të drejtave të njeriut, shtypja me forcë e protestave pro-demokracisë përben krim kundër njerëzimit.
Damasku zyrtar nuk i është përgjigjur ende raportit.
Ai thjesht pretendon se shumë nga të vrarët nuk kanë qenë viktima të ushtrisë, por të bandave të armatosura kriminale.