Sistemi gjyqësor në Shqipëri, ka vullnet për ta përmirësuar

Nënkryetari i Gjykatës së Strasburgut, Josep Casadevall Medrano

Nënkryetari i Gjykatës së Strasburgut, Josep Casadevall Medrano, thotë se sistemi gjyqësor në Shqipëri ka nevojë të përmirësohet. Por Medrano çështjen e korrupsionit në sistem ja hedh fajin përplasjes së ligjeve me standard europian që nuk përputhen me mentalitete të vjetra të vendeve të Europës Lindore. “Nga pikëpamja e Gjykatës Europiane për të Drejtat e Njeriut nuk mund të them ndonjë gjë të saktë për çështje që vijnë nga Shqipëria sepse nuk ka çështje që i përkasin korrupsionit. Por dua të them se çështjet e korrupsionit nuk gjejmë vetëm në Shqipëri, gjejmë në çdo vend me demokraci të re. Zgjidhja vjen vetëm nga një vullnet politik. Ajo që konstatoj është se në të gjitha vendet e lindjes ku janë ndërtuar ligje dhe kushtetuta të standardeve europiane, konsiderohen si tekste ligjore që nuk përputhen me mentalitet e vjetra të këtyre vendeve. Kjo mospërputhje prodhon edhe korrupsionin. Kjo do të dojë kohën e vet derisa të vijë në vend”, shprehet Josep Casadevall Medrano.
Numri dy i Strasburgut i beson vullnetit politik në Shqipëri për përmirësimin e sistemit.
“Ju thoni se ka një problem që shkon shumë larg. Pyetja i kalon pozitat e një gjykatësi. Por nëse çështja është kështu si parashtrohet pyetja atëherë cilido duhet ta sjellë çështjen në Strasburg. Gjithsesi, Shqipëria u bë anëtare e Këshillit të Europës dhe për këtë ajo përmbushi disa standarde. Shqipëria synon të jetë kandidate për në BE dhe për këtë duhet të përmbushë disa standarde të tjera”, thotë ai.
Nënkryetari i Gjykatës së Strasburgut deklaroi se sipas statistikave shteti shqiptar fiton 90 për qind të proceseve gjyqësore që shkojnë në Strasburg dhe se nuk konsiderohet aspak si shtet problematik.