Skandali me tokën, komuna kërcënon qarkun me gjygj

28/01/2005  Gashi e Llulla kundër Alizotit: Duhej të na kishte thirrur në analizë

Kryertari i komunës së Rashbullit dhe kryetari i

komunës Katundi i Ri, në Durrës, kanë reaguar menjëherë

pas akuzave të bëra ndaj tyre për abuzime dhe vjedhje

të tokave. Një ditë pasi kryetari i Qarkut të

Durrësit, Genci Alizoti, është shprehur publikisht se

kryetarët e komunave të mësipërme kanë punuar në

mënyrë të pandërgjegjshme, të dy kryetarët në një

konferencë për shtyp e kanë cilësuar deklarimin e

Alizotit si të papërgjegjshme. “Alizoti, para se të na

akuzojë, duhet të përgjigjet përse nuk jami ftuar në

analizën vjetore të punës komisionit të tokës së

Qarkut, dhe aty, në praninë time, të lëshonte serinë e

akuzave të pavërteta”, ka thënë kryetari i komunës

Katundi i Ri, Sadik Llulla. Të dy krerët e komunave

kanë pohuar se komisionet e ndarjes së tokës në

komunat e tyre kanë vepruar në përshtatje me ligjin

dhe se moskonfirmimi i tapive nga Alizoti nuk mund të

komprometojë punën e komisioneve. “Alizoti është i

saktë kur pohon se këto dy komuna, ku drejtojmë ne,

janë të Berishës”, ka thënë kryetari i komunës së

Rashbullit, Hysen Gashi, “por Alizoti duhet të mësojë

të thotë të vërtetën dhe të mos akuzojë sipas

urdhëresave që i jep partia e tij”. Sipas Gashit,

komisioni i tokës në komunën e tij nuk ka marrë asnjë

vendim për ndarje toke, pasi kjo tokë është e ndarë që

në vitin 1991. “Ne dhe komisioni ynë po bëjmë atë që

zyra e regjistrimit të tokës nuk e ka bërë prej 10 apo

13 viteve”, tha Gashi. Kryetari i komunës së

Rashbullit u shpreh se mungesa e azhornimit të tokës

ka shkaktuar jo pak probleme në komunë dhe, sipas tij,

kjo është drejtpërdrejt përgjegjësi e administratës

socialiste, ku përfshihet edhe Alizoti. “Asnjë m2 tokë

nuk është e lirë në komunën tonë, pasi ajo është ndarë

shumë vite më parë në zbatim të ligjit 7501 “Për

tokën”, shtoi Gashi. Ai vuri në dukje se në Rashbull

ka 170 familje të mbetura pa tokë, ndërkohë që 230

familje janë deklaruar pa prona edhe nga kryetari i

komunës Katundi i Ri. Të dy krerët e pushtetit vendor

kanë thënë se komisionet e tokave po punojnë për

plotësimin e dokumentacionit dhe jo për ndarjen e

tokës. “Ne kemi urdhëruar që komisionet të plotësojnë

të gjithë dokumentacionin që do t’u jap mundësi

pronarëve të ligjshëm të pajisen me kartën jeshile”,

tha Llulla, ndërkohë që kryetarët e komunave kanë

cilësuar se reforma e tokës nuk ka përfunduar. “Për aq

kohë sa do të kemi familje pa tokë, porqë kanë të

drejtën ligjore të pajisen me tokë, kjo reformë nuk

mund të quhet e mbyllur”, thanë ata. Krerët e

komunave të akuzuar për abuzime me ndarjen e tokës

kanë deklaruar se do të jenë të gatshëm të përballen

me drejtësinë. “Vetëm komisioni i ndarjes së tokës së

fshatit është i ligjshëm të ndajë tokën në bazë të

ligjit, ndërsa si ne edhe Genci Alizoti mund t’i

drejtohemi gjykatës për mosmarrëveshjet”, cilësuan

kryetarët e komunave, të cilët kanë thënë se Alizoti

nuk mund të dalë mbi ligjet e shtetit dhe as të bëjë

lojë politike me akuza të pabaza. Në komunën e

Rrashbullit e gjithë sipërfaqja prej 4000 ha tokë

është ndarë plotësisht shumë vite më parë, ndërsa në

komunën Katundi i Ri nga 4030 ha tokë ka mbetur pa u

ndarë një sasi shumë e vogël toke. Të dy krerët e

komunave të akuzuar për shkelje të ligjit, kanë thënë

se komisionet e tokës në këtë kohë po plotësojnë

formularët, që duhet të plotësoheshin shumë kohë më

parë dhe se të gjithë ata që kanë përfituar tokë janë

përfitues të ligjshëm. Asnjëri prej tyre nuk ka

pranuar akuzën se tapitë e dhëna nga komisionet janë

të paligjshme, ndërsa nuk kanë rezervuar denoncimin e

deklaratës së Alziotit si të nxitur nga stukturat e

partisë së tij. “Afrimi i fushatës elektorale e ka

vënë Alizotin përballë detyrimit të shpifë për të

gjithë drejtuesit e komunave dhe bashkive të drejtuar

nga anëtarë të PD-së apo të tjerë të pavarur”, u

shpreh Gashi, i cili i ka kërkuar Alizotit të

deklarojë gjithashtu edhe për taksat që ka mbledhur

pushteti vendor. Komuna e Rashbullit është e vetmja

në nivel vendi që ka siguruar vjeljen më masën 98 për

qind të taksës së tokës, ndërsa ka arkëtuar edhe një

milion dollarë nga taksa vendore.

Alizoti: Asnjë tapi toke nuk do të konfirmohet

Kryetari i Qarkut të Durrësit, Genci Alizoti, ka

deklaruar se do të pranojë të konfirmojë vetëm tapitë

e plotësuara para dhjetorit të vitit 1995, ndërsa të

gjitha tapitë e tjera që do t’i afrohen për konfirmim do

të cilësohen të paligjshme. Në takimin e parë të

komisionit të tokës për këtë vit, Alizoti është

shprehur se nga 160 aktmarrje toke në pronësi të

nënshkruara nga komisionet e tokave të komunave dhe

bashkive të Qarkut të Durrësit në vitin e kaluar,

vetëm 6 prej tyre janë konfirmuar. Alizoti ka qenë

shumë i ashpër kryesisht ndaj komisioneve të tokës në

komunën e Rrashbullit dhe Katundi i Ri, por ka

kritikuar për moszbatim të ligjit, sipas tij, edhe

komuna dhe bashki të tjera të Qarkut. Ai, pasi ka

kërkuar që këto komisione të njohin në detaje ligjin

8053, datë 21.12.1995, “Për kalimin në pronësi pa

shpërblim të tokës bujqësore” dhe ligjit nr. 8312 “Për

tokat bujqësore të pandara”, ka paralajmëruar krerët e

komunave problematike për penalizime, lidhur me

abuzimet në ndarjen e tokës. kryetari i Qarkut të

Durrësit ka përmendur problemin e ndarjes së tokës të

ish-NB-ve, tokat që shtrihen në zonën e zhvillimit të

turizmit, ato që administrohen nga ndërmarrjet e

përbashkëta dhe tokat që gjenden benda zgjerimit të

vijës kufizuese të përcaktuar nga KRRTRSH. Alizoti ka

deklaruar se pjesën më të madhe të tapive, të

cilësuara të paligjshme dhe që nuk janë pranuar të

konfirmohen prej tij, e zë komuna Katundi i Ri me 46

tapi, komuna Rashbull me 43 tapi dhe rrethi i Krujës

me 35 tapi. Rastet e deklaruara janë cilësuar veprime

të papërgjegjshme të punës së krerëve të komunave dhe

bashkive, ndërkohë që këta të fundit kanë pohuar se të

gjitha deklarimet e Alizotit janë të nxitura

politikisht.