Skënderbeu mund Teutën, rikthen shpresën

Skënderbeu triumfoi 3-0 ndaj Teutës në ndeshjen e prapambetur të vlefshme për javën e 20-të të Kategorisë Superiore, ndërkohë që të dielën do të luajë takimin e dytë të pazhvilluar, atë kundër Shkumbinit (java 22). Mesfushori Klevis Roshi, me dygolëshin e tij në harkuan e 15 minutave, 51' e 66', ishte dhe heroi i takimit, ndërkohë që sulmuesi kroat Milain Guerrib realizoi in-extremis tripletën e pastër të "ujqërve të dëborës". Skënderbeu nuk e shijonte fitoren në një ndeshje të kampionatit pas një serie të gjatë prej 16 javësh, më saktë nga 19 shtatori i vitit 2009, që kur skuadra korçare atëherë nën drejtimin e Gert Haxhiut kishte fituar 4-1 kundër Gramozit në javën e 4-t. Korçarët u ngjitën në kuotën e 18 pikëve, por duke qëndruar sërish në vend të fundit (1 pikë më pak se Gramozi, 19), ndërkohë që ka dhe një ndeshje për të luajtur nga faza e dytë, atë kundër Shkumbinit. Ndeshja kishte edhe një sfidë specifike brenda saj, pasi përballë njeri-tjetrit ishin dy trajnerë, Mirel Josa (Skënderbeu) dhe Ylli Shehu (Teuta), të cilët ishin së bashku gjatë 19 javëve të para të këtij edicioni te skuadra durrsake.