S’ndalet Dinamo, Gramozi “tallet” me kampionët
Leonard Karaj
Dinamo fiton edhe në Durrës, Shkumbini shpërfytyron Apoloninë e Hasan Likës ndërsa Gramozi “tallet” me kampionët bardheblu në kryeqytet.
Shokohet Tirana por më tepër tifozeria e saj. Kampionët në fuqi nuk kanë shkuar më shumë se një barazim 1-1 ndaj kolonjarëve, duke marrë vetëm një pikë që nuk i shërben për asgjë dhe për më tepër e zhyt atë në një krizë të plotë loje e rezultati, ku shpresat e vetme janë tashmë përfundimisht në Kupën e Shqipërisë. Pritej një reagim i fuqishëm i Tiranës në këtë takim, nisur jo vetëm nga kritikat ndaj skuadrës pas barazimit në Korçë, por edhe nga fakti se për herë të parë grupi ishte më i plotë se kurrë, duke mos pasur asnjë të dëmtuar apo të skualifikuar. Përfundimisht, skuadra e drejtuar nga Alban Tafaj i ka thënë lamtumirë titullit kampion për këtë edicion, edhe pse jo ende matematikisht, pasi diferenca me kreun, që mbahet nga Dinamo, është e madhe, plot 16 pikë. Pritej që, duke parë se rivalet e bardhebluve, Dinamo dhe Besa, luajnë në transfertë këtë javë, nuk do të ishte çudi që Tirana të rikuperonte diçka në renditje. Por ka qenë e kotë, sepse Dinamo nuk njeh kundërshtar në këtë kampionat. Ka luajtur në transfertë, me Teutën, por ka fituar pastër, 3-1, duke marshuar pa asnjë problem drejt titullit kampion, deri tani pa e ditur akoma se çfarë është shija e humbjes.
Po dje, një tjetër kryesuese, e vendit të tretë, Apolonia e Fierit, luajti në transfertë, në Peqin, ndaj Shkumbinit vendas. Skualifikimi nga Kupa e Shqipërisë që në 1/16 finale, patjetër që do ta kishte rritur ngarkesën psikologjike te lojtarët fierakë. Gjë që u vu re edhe në fushën e lojës, ku pati thuajse një skuadër në fushë, Shkumbini, që fitoi bindshëm edhe me rezultat, 3-0. Në këtë mënyrë, Apolonia detyrohet të këmbejë vendet me Tiranën, duke zbritur vetë në vendin e katërt, me 1 pikë më pak se bardheblutë, që vijnë të tretët, pas Besës. Sot, tri takimet e tjera ku Besa e vendit të dytë do luajë në transfertën e Laçit. Në kryeqendrën e Veriut, në Shkodër, Vllaznia do të presë Kastriotin e Krujës dhe në Vlorë, Flamurtari, në një situatë shumë kritike, i fundit në renditje, i dalë edhe jashtë Kupës së Shqipërisë, do të luajë ndaj Skënderbeut.
Superliga/ Java 14
Teuta-Dinamo 1-3
Shënues: Mile 39’ (p)/ Kuli 9’, Soza 25’, Bakaj 65’
Tirana-Gramozi 1-1
Shënues: Muka 11’ (p)/ Dos Santos 52’ (p)
Shkumbini-Apolonia 3-0
Shënues: Çaushaj 4’ (p), 59’, Dervishi 54’
Sot, ora 13:00
Vllaznia-Kastrioti
Sot, ora 13:30
Flamurtari-Skënderbeu
Laçi-Besa
Renditja
Nr. Ekipi ND F B H GSH GP +/- P
1. Dinamo 14 12 2 0 27 8 19 38
2. Besa 13 7 4 2 13 6 7 25
3. Tirana 14 6 4 4 14 11 3 22
4. Apolonia 14 6 3 5 21 17 4 21
5. Teuta 14 6 1 7 15 19 -4 19
6. Shkumbini 14 5 3 6 14 14 0 18
7. Laçi 13 4 4 5 14 14 0 16
8. Kastrioti 13 4 4 5 12 15 -3 16
9. Skënderbeu 13 3 4 6 15 17 -2 13
10. Vllaznia 13 3 3 7 9 15 -6 12
11. Gramozi 14 2 6 6 9 18 -9 12
12. Flamurtari 13 2 4 7 8 17 -9 10