Spahiu, letër Topallit: Kuvendi të më japë të drejtën e fjalës

Nënkryetari i KLD-së, Kreshnik Spahiu, i ka dërguar një letër kryetares së Kuvendi, Topalli, në të cilën kërkon të drejtën për të folur në seancë parlamentare.

Spahiu shprehet në letër se Komisioni i Ligjeve i ka mohuar të drjetën e fjalës, ndaj është detyrim kushtetues i Kuvendit të dëgjojë argumentet e tij.

Një javë më parë, nënkryetari i KLD u largua nga Komisioni i Ligjeve, ku po diskutohej nisma e demokratëve për shkarkimin e tij.

Spahiu u largua nga mbledhja pas kërkesës së kryetarit Ilir Rusmali.

Deputetët e opozitës kanë debatuar me kreun e Komisionit të Ligjeve në lidhje me këtë fakt, duke theksuar se komisioni duhej të kishte dëgjuar qëndrimin e nënkryetarit të Këshillit të Lartë të Drejtësisë.

Ne nuk bëhemi pjesë e kësaj farse, janë shprehur deputetët e opozitës në mbledhje.