"Spanja në kaleidoskop", tani edhe në Korçë

"Spanja në Kaleidoskop", pas Shkodrës, është ndalur në Korçë. Gjashtë filma, të gjithë produksione spanjolle do të shfaqen falas në ekranin e kinemasë "Millenium" për dashamirësit e kinematografisë. Ambasada spanjolle ka sjellë nëpërmjet këtij projekti të veçantat dhe magjinë e kinematografisë së këtij vendi. Kinematografia është zgjedhur si forma më e mirë e shprehjes së aktualitetit dhe botës spanjolle me karakterin dhe problematikën e saj. "Spanja në kaleidoskop" siç është titulluar java e filmit, synon të sjellë diversitetin e kulturave. Për këtë aktivitet të veçantë kinematografik janë përzgjedhur filmat më të vlerësuar në rang ndërkombëtar të produksioneve spanjolle në vite dhe ato të cilat kanë marrë çmime të shumta kinematografike.