Synon rekorde në klub

Wayne Rooney është i fokusuar të bëhet golashënuesi më i mirë në histori të Manchester Unitedit. Sulmuesi anglez momentalisht gjendet në kuotën e 158 golave dhe është paksa në distancë nga rekordi i Sir Bobby Charltonit, i cili për ‘Djajtë e Kuq’ në të kaluarën kishte shënuar 249 gola, në periudhën prej 17 vjetësh dhe 606 paraqitjesh me këtë klub.

Mirëpo, ish futbollisti i Evertonit ndien se në 5-6 vjetët e ardhshëm mund ta kalojë legjendën e këtij klubi. “Do të ishte një gjë fantastike nëse ndonjëherë do ta arrija këtë rekord dhe do të bëhesha golashënuesi më i mirë në histori të Manchester Unitedit. Do të isha absolutisht i tronditur nëse e arrij këtë. Unë do ta synoj këtë dhe ndihem i aftë që ta bëj një gjë të tillë në 5-6 vjetët e ardhshëm”, deklaroi Rooney për tabloidin britanik ‘The Sun’.

“Nëse e bëj këtë, do të ishte një arritje e jashtëzakonshme për mua. Do të isha mjaft i nderuar dhe krenar. Sir Bobby Charlton ishte legjendë absolute, lojtar i madh dhe do të isha i mahnitur nëse do ta kaloja rekordin e tij, të cilin e ka mbajtur gjatë. Shpresoj të mos kem pengesa, si lëndimet apo raste të ndonjë natyre tjetër”, përfundoi Rooney.