Taksa e sheshte molle sherri mes opozites dhe pozites

Debate të forta dhe akuza të ndërsjellta shoqëruan diskutimin e ligjit të tatimit mbi të ardhurat. Kjo çështje u shfrytëzua nga deputetët opozitarë për t’iu rikthyer kundërshtive të tyre mbi taksën e sheshtë. Sipas deputetit te Partisë Socialiste, Arben Ahmetaj kjo taksë është një padrejtësi shoqërore, pasi  i merr taksa shtresave të varfra të shoqërisë,  ndërkohë që favorizon ata persona me të ardhura të larta.
Por përkundrejt këtij pretendimi, ministri i Financave, Ridvan Bode deklaroi se opozitës nuk i vjen për shtat sistemi aktual i taksave, pasi çoi në rritje të vazhdueshme ekonomike. Referuar ligjit “Për tatimin mbi të ardhurat”, deputetët opozitarë u deklaruan kundër.
Deklarimet e para të të ardhurave do të bëhen në fund të muajit shtator. Sipas ndryshimeve të kaluara në seancë plenare, deklarimi i detyrueshëm do të bëhet nga ata persona që kanë të ardhura më tepër se 2 milionë lekë të reja në vit.