Taksistët i lënë një javë afat Ramës për konkurrencën e pandershme

Taksistët e kryeqytetit njoftojnë se do të nisin protestat ndaj qeverisë, e cila nuk i mbron nga konkurrenca e pandershme. Gjatë një takimi me kryetarin e Bashkisë së Tiranës, Edi Rama, taksistët kanë deklaruar se e kanë ngritur vazhdimisht këtë problem që po i çon drejt falimentimin, por nuk kanë gjetur zgjidhje. Ata janë shprehur se nëse nuk përmbushen kushtet ata do të vijojnë protesta pa afat, të cilat do të nisin javën e ardhshme. Sipas tyre, konkurrenca e pandershme e taksive private po i falimenton, ndërkohë që ata vetë janë të detyruar të paguajnë të gjitha taksat brenda rregullave. Rama i vuri në dijeni se do të bëjë të pamundurën përsa u përket detyrimeve të pushtetit vendor. Sipas tij, Policia Bashkiake ka pezulluar aktivitetin e 812 taksive që kanë ushtruar aktivitetin pa licencë. E njëjta situatë do të vijojë deri në zhdukjen e këtij fenomeni. Kjo nuk është hera e parë e protestave të Shoqatës së Taksistëve.
Shoqata e Taksive 1+4 “Tirana” ka protestuar rreth dy javë më parë, para Bashkisë së Tiranës dhe Ministrisë së Transporteve kundër hartimit të projektligjit të ri që po harton Ministria e Transporteve për liberalizimin e shërbimit taksi dhe heqjen përfundimtare të licencave. Ata kërkojnë moskryerjen e këtij projektligji, i cili do të ishte një shkelje e të drejtave të tyre, si biznes, pasi do të sjellë krijimin e konkurrencës së pandershme në shërbimin taksi. Anëtarët e kësaj shoqate kanë hartuar një relacion që është dërguar në këtë ministri në shenjë proteste kundër udhëzimit dhe duke e argumentuar se përse nuk duhet të bëhet liberalizimi përfundimtar i licencave të taksive. Kështu, taksistët ndihen të terrorizuar nga kjo nismë e Ministrisë, pasi konkurrenca e pandershme pritet që të lindë me dëshirën e shtetit. Kryetari i Shoqatës së Taksistëve, Gëzim Bardhi, shprehet se kjo nismë është e padrejtë dhe mbi ta do të rëndojë papunësia dhe konkurrenca e pandershme, e cila këtë herë po shtyhet nga shteti. Sipas anëtarëve të Shoqatës, në çdo qytetar do të bënte një punë të dytë si taksist.

14 Nentor 2009