Të gjithë të çmendur pas Majkëll Shumakerit

Ishte njëherë e një kohë Shumakeri? Jo, Shumi është ende. Vetëm tre javë ndajnë ëndrrën e shumë të pasionuarve nga realiteti. Shtatë herë kampioni i botës do të rikthehet të drejtojë një makinë "Ferrari" në një garë të vërtetë. Në moshën 40-vjeçare gjermani do të rifutet në lojë për të "rigjallëruar" një Botëror të mallkuar për Ferrarin, nga çështja e difuzorëve, përplasja me FIA-n e Maks Moslit, dhe deri te incidenti i Masës. Shumaker do të hipë në një F60 numër 3 të mikut Filipe. "Jam i kënaqur që e binda Majkëll Shumakerin, ka thënë Mantezemolo. Formula 1 kishte nevojë të ringjallej. Do të fitoni me Shumin? Sigurisht, nuk shkojmë në Valencia për t‘u tallur". Kampioni i botës me MekLaren, Luis Hemilton: "Majkëll është një nga më të mëdhenjtë e këtij sporti, për mua është një nder të garoj me të për herë të parë". Por mbreti Shumaker nuk humbet kohë, dje zbriti në Muxhelo për t‘u stërvitur.