Të vegjëlit kundër të mëdhenjve

Në turin e dytë përballen 16 skuadra të ndara në tetë çifte. Në Kupën e Shqipërisë marrin pjesë nëntë fitues të këtij trofeu
Dash Frashëri

Premio speciale nga të dy presidentët e klubeve. Shkumbini-Elbasani pritet të dhurojë edhe emocionet më të mëdha në turin e dytë të Kupës së Shqipërisë, ku përballen 16 skuadra të ndara në tetë çifte dhe marrin pjesë nëntë fitues të këtij trofeu në 55 edicionet e mëparshme. Ndeshja e prefekturës mes Shkumbinit dhe Elbasanit (2 herë fitues i Kupës) do të përbëjë edhe kulmin e këtij turi. Të dy ekipet shënuan një bollëk golash në dy ndeshjet e turit të parë: 8 Shkumbini kundër Bilishtit dhe 7 Elbasani kundër Tomorit. Të dyja skuadrat po përjetojnë momente të mira në kampionat, gjë që do të reflektojë edhe në sfidat e dyfishta të Kupës. Kampionia e dimrit, Dinamo (13 herë fituese e kupës),
do të përballet në “Loni Papuçiu” kundër një Apolonie ambicioze, që ende ruan aromën e trofeut të vetëm të fituar në futbollin shqiptar në vitin 1998. Për blutë e Agim Canajt, me vlerë do të jetë debutimi i argjentinasit Hanush, ndërkohë që kryesuesve të kampionatit mund t’i mungojë mesfushori Igli Allmuça, autori i dy golave në fitoren 2-0 kundër Teutës. Tiranën, 13 herë fituese e Kupës, e pret një ballafaqim i vështirë në Laç. Tekniku Sulejman Mema, i cili arriti të fitojë 3-0 kundër vëllait të madh të laçianëve, Kastriotit të Krujës, mund të provojë të gjitha blerjet dimërore. Titullarë kundër Laçit do të jenë Lekë Kçira, maqedonasi Sasho Gjoreski, kosovari Berat Hyseni dhe francezi Loren Mohelebi. Laçi, që eliminoi në turin e parë të Kupës Lushnjën, u mund të shtunën 1-0 pikërisht nga Lushnja në ndeshjen e vlefshme për kampionatin e kategorisë së parë.
Teuta e Durrësit, një ekip mjaft në vështirësi dhe që gjendet në zonën e ftohtë të Kategorisë Superiore, do të luajë kundër një kundërshtari agresiv në fushën e tij, pasi Turbina nuk të fal kollaj. Vllaznia e ulje-ngritjeve të mëdha në këtë kampionat do të luajë kundër një Besëlidhjeje të Neptun Bajkos, që synon të lërë shenjë në Kupë, pas asaj fitoreje të thellë 8-0 me Pogradecin. Trajneri Mirel Josa nuk dëshiron surpriza, pasi dhe objektivi kryesor i shkodranëve të presidenit Fushaj,
Flamurtari dhe Kastrioti, do të luajnë mes tyre derbin e mesit të tabelës së Superligës, një ndeshje e barabartë e dy prej skuadrave që pritej më shumë në këtë sezon prej tyre.

KUPA E SHQIPËRISË, EDICIONI I 56-të

TURI I DYTË

Laçi-Tirana
Turbina-Teuta
Besëlidhja-Vllaznia
Skënderbeu-Partizani
Apolonia-Dinamo
Luftëtari-Besa
Shkumbini-Elbasani
Flamurtari-Kastrioti
* Ndeshjet do të luhen më 13-27 shkurt 2008

16 skuadrat në garë

Tirana, Skënderbeu, Partizani, Besa, Vllaznia, Shkumbini, Turbina, Apolonia, Flamurtari, Dinamo, Elbasani, Kastrioti, Besëlidhja, Laçi, Luftëtari, Teuta.

Foto: Besa, fituese e Kupës së Shqipërisë për edicionin e kaluar

Turi i Parë
Skënderbeu-Tepelena 1-0 (2-3)
Tirana-Butrinti 4-2 (2-2)
Partizani-Skrapari 2-1 (2-0)
Besa- Bylis 3-0 (3-2)
Vllaznia-Naftëtari 6-1 (3-2)
Shkumbini-Bilishti 3-1 (5-4)
Turbina-Erzeni 2-0 (1-1)
Apolonia-Sopoti 3-0 (1-2)
Flamurtari-Ada 4-1 (0-2)
Dinamo-Dajti 3-1 (2-0)
Elbasani-Tomori 7-2 (0-0)
Kastrioti-Burreli 2-0 (2-3)
Besëlidhja-Pogradeci 8-0 (0-2)
Lushnja-Laçi 1-1 (1-3)
Teuta-Iliria 3-1 (1-1)
Luftëtari-Gramshi 6-0 (0-2)
• Në kllapa rezultatet e ndeshjeve të para

Besa, në mbrojtje të trofeut 1

Besa, fituesja e edicionit të 55-të të Kupës së Shqipërisë, do të luajë në Gjirokastër. Trajneri Starova shpreson të arrijë kualifikimin qysh në takimin e parë, duke parë se kupa ka mbetur dhe objektivi kryesor i skuadrës kavajase. Kapiteni i Besës, Lila, beson se skuadra ka rigjetur veten pas barazimit spektakolar 3-3 me Partizanin. Luftëtari i Petraq Bifshës po përjeton një moment aspak të mirë në kampionatin e Kategorisë së Parë, duke u renditur në vendin e 14-të nga 18 ekipe që ka kjo kategori.

12 + 4

12 skuadra të Kategorisë Superiore dhe katër të Kategorisë së Parë, Luftëtari, Turbina, Laçi dhe Apolonia, marrin pjesë në turin e dytë të Edicionit të 56-të të Kupës së Shqipërisë. Nga skuadrat që aktivizohen aktualisht në Kategorinë e Parë, vetëm Apolonia ka mundur ta fitojë një herë Kupën në vitin 1998.

3 PËRJASHTIME

Tre ekipe futbolli, Delvina, Maliqi, Përparimi, u përjashtuan nga Kupa e Shqipërisë së këtij edicioni dhe u përjashtuan gjithashtu edhe nga aktiviteti i Kupës së Shqipërisë për vitin e ardhshëm. Të tre klubet nuk u paraqitën në ndeshjet e turit të dytë duke paraqitur si arsye pamundësinë financiare.

Partizani në kërkim të Kupës 16

Partizani, rekordmeni absolut i Kupës së Shqipërisë me 15 trofe, do të përballet me Skënderbeun në Korçë, duke shpresuar se do të përfitojë nga kriza e skuadrës së Renato Rrapos, të cilën e mundi dy herë rresht në kampionat. Skuadra e kuqe nuk e fiton trofeun e dytë më të rëndësishëm qysh nga sezoni 2003-2004, kur në finale mposhti Dinamon me rezultatin e ngushtë 1-0, një takim shumë i përfolur për lehtësitë që krijuan blutë, atëherë nën presidencën e Mihal Delijorgjit. Në turin e parë, skuadra korçare mposhti Tepelenën, ndërsa Partizani Skraparin.

13 Shkurt 2008