Teatri i Gjirokastrës, vështirësi për të vënë vepra në skenë

Vënia në skenë e një shfaqje vazhdon të mbetet një nga misionet e pamundura për trupën e qytetit të Gjirokastrës.
Pas një vitit heshje, trupa e teatrit "Zihni Sako" fton spektatorët gjirokastritë në shfaqjen e komedisë satirike në nobelistit Dario Fo, me titull "Nuk paguaj, nuk paguaj".
Shfaqja është ngjitur në skenë nën regjinë e Pirro Qiqit dhe skenografi të Stefan Papamihalit.
Në qendër janë problemet sociale, të cilat përdoren për të goditur politikat që ndiqen ndaj masës së gjërë të popullit. Por spektatorët nuk kanë marrë atë që prisnin.
Dekori i varfër nuk krijoi hapësirat duhura as për regjizorin dhe as për aktorët.
Por nga ana tjetër, gjithëçka është e justifikuar kur mëson se komedia u vu në skenë me një fond prej vetëm 32 000 lekësh të reja, nga të cilat 10 mijë ishin në dispozicion për dekorin, garderobën dhe rekuizitën
Gjirokastra mbetet një nga qytet e rralla në vend që ka abandonuar teatrin profesionist.
E ndodhur në varësinë financiare të bashkisë së qytetit, trupa prej 9 aktorësh has në vështirësi sa herë që përpiqet të vërë në skenë një shfaqje të re.
Është kjo një nga arsyet që kjo trupë nuk merr pjesë në asnjë eveniment teatror që nga viti 1995.