Telefonatat e Pinarit me Delijorgjin në Gërdec

TIRANE – Askush nuk mund të kalonte pragun e fabrikës së demontimit të municioneve në Gërdec, para 15 marsit 2008, nëse më parë nuk merrte konfirmimin e “të zotërve” të saj. Urdhri nuk përjashtonte as zyrtarët e lartë të Ministrisë së Mbrojtjes. Zigur Cani, ish-roje në fabrikën, shpërthimi i së cilës vrau 26 persona dhe plagosi më shumë se 300 të tjerë, tregoi dje në gjykatën e Tiranës si kishte penguar të hynte në fabrikë Ylli Pinarin, kreu i MEICO-s. Sipas dëshmitarit, Pinari ishte lejuar vetëm kur hyrjen e tij e kishte lejuar nga brenda fabrikës, Mihal Delijorgji. Ndërsa ish-roja tjetër Fejzi Shehu, rrëfeu se ditën e ngjarjes në fabrikë u futën tre karroca të salduara te shtëpia e Qemal Deliut. Sipas Shehut, e fundit prej tyre ishte futur në fabrikë rreth 30 minuta para shpërthimit të tragjedisë.
Dëshmia e Zigur Canit
“Pozicioni im si punonjës i shoqërisë së sigurisë ishte te porta ballore e fabrikës, aty ky bëheshin hyrje daljet e mjeteve dhe të njerëzve. Nuk duhet të lejoja askënd të hynte pa lejë në fabrikë. Punëtorët mblidheshin në grupe dhe dilte i merrte Vangjeli dhe Dritan Minxolli. Delijorgji vinte shpesh në fabrikë. Me shpesh e kam fjalën që, në mos çdo ditë, vinte një herë në dy ditë. Ylli Pinarin e njihja. Një rast nuk e kam lënë të futet. Nuk e kisha të shënuar targën e tij. Më tha që: Jam drejtor. I thashë që drejtor njihja vetëm Dritan Minxolli. Më mori Mihal Delijiorgji në telefon dhe më tha ta lija të kalonte. Sokol Gjeci vinte në fabrikë çdo ditë. Qemal Deliun e njihja pasi kishte shtëpinë më afër fabrikës dhe ishte i pari punëtor që vinte në punë. Qemali nxirrte karroca nga fabrika, pasi i saldonte ato. Karrocat dilnin me urdhër nga drejtori. Pasi saldoheshin ato ktheheshin në fabrikë. Vonoheshin rreth gjysmë ore. Makinat me municion vinin pas orës 12:00. Deri në orën 14:00,kur unë mbaroja turnin, vinin rreth 15 makina. Në fabrikë ka qenë një amerikan, por nuk e di se ç’bënte aty. Makinat me municione shoqëroheshin me makina të Policisë Ushtarake. Ditën e ngjarjes nuk kam qenë në punë. Kamionët që transportonin barutin kishin targa të huaja, por të huaj ishin dhe drejtuesit e tyre. Delijorgjin ma ka prezantuar Dritani si pronarin e fabrikës. Në repart nuk ka pasur makina me targa zyrtare. Nuk ka ardhur asnjë person nga Ministria e Mbrojtjes, për sa kam qenë në shërbim. Ylli Pinari ka ardhur me makinë private”.
Rrëfimi i Fevzi Shehut
“Gjatë kohës së punës në shoqërinë private të sigurimit, për dy ditë kam zëvendësuar Zigur Canin. Në 15 mars kam qenë në punë. Isha i stacionuar te porta. Ditën e ngjarjes, kur shkova në punë, kishin ardhur vetëm punëtorët e ngarkim-shkarkimit të predhave, pasi gjatë natës kishin ardhur municionet. Atë ditë ishin rreth 7-8 kamionë ushtarakë. Urdhrin për futjen e njerëzve e merrja nga Vangjeli. Atë ditë në vendrojën numër 2 ka qenë Reshit Kruja. Në momentin e shpërthimit unë isha te porta. Aty ishte një fëmijë i vogël që i solli bukë nënës së tij. Ndërsa Vangjeli me Dritanin po dilnin nga fabrika. Mbylla portën dhe po çoja bukën tek ajo gruaja për të cilën e sollën. Sa u afrova, pashë flakën mbi thasët e barutit. Flaka nga unë ishte rreth 50 metër larg. I alarmuar vrapova deri te porta. Komunikova me rojën tjetër. Ai më tha të lajmëroja zjarrfikësen. I thashë që zjarrfikësja nuk ka çfarë t’i bëjë kësaj, por largohu. Vrapova, ndërkohë që kisha rreth meje njerëz që vraponin duke thirrur, qarë e ulëritur. Pasi ishim larguar pak, ndodhi shpërthimi i parë. Kur arritëm te vendi që quhet ‘mbikalimi i Gërdecit’ na kapi shpërthimi i dytë. Pësova djegie në pjesën e pasme të kokës dhe në veshë. Më pas me një makinë shkova dhe u mjekova në Fushë-Krujë. Ditën e ngjarjes kanë dalë tre karroca për saldim. Dy dolën njëherazi më parë, ndërsa një e tretë pak më vonë. Ishte një person rreth 60 vjeç, i hollë e i zeshkët. Karroca e fundit ka dalë rreth orës 11:00. E pyeta se ku po shkonte. Më tha që “do t’i saldoj këto”. Përgjegjësi e lejoi të dilte. Karrocat u futën më vonë në fabrikë. E fundit është futur rreth 30 minuta para shpërthimit. Nuk kam dëgjuar krisma para shpërthimit. Për personin që nxori karrocat, më pas mësova se quhej Qemal Deliu”. a.b.