Tenton të vjedhë skrap, pranga një 22-vjeçari

Bien sërish në rrjetën e policisë vjedhësit e hekurishteve në Kombinatin Metalurgjik të Elbasanit, shitja e të cilave riciklohet po këtu. Rasti më i fundit është shënuar rreth orës 19:30 të së martës. Sipas burimeve zyrtare të policisë lokale, mësohet se është arrestuar në flagrancë 22-vjeçari Evis Çela, lindur e banues në fshatin Bradashesh të Rrethit të Elbasanit. Sipas burimit në fjalë, arrestimi i tij u bë pasi ka tentuar të vjedhë hekurishte (skrap) në ambientet e Uzinës së Petëzimit, tek ish-Kombinati Metalurgjik, marrë me koncesion nga "Kurum". Mësohet se 22-vjeçari e ka kryer vjedhjen në bashkëpunim me 15-vjeçarin me inicialet J.T., lindur e banues në fshatin Bradashesh dhe R.Ç., vjeç 16, lindur e banues në fshatin Bradashesh, i dënuar më parë për veprën penale të vjedhjes. Mësohet se këta shtetas janë kapur në flagrancë nga punonjësi i policisë private për ruajtjen e sigurimin e këtij objekti, i cili më pas ka lajmëruar shërbimet e policisë. Nga ana e policisë u bë shpallja në kërkim ndaj të miturve J.T. dhe R.Ç., dhe po punohet për gjetjen e shoqërimin e tyre. Materialet iu kaluan Prokurorisë së Rrethit Gjyqësor Elbasan për veprime të mëtejshme për veprën penale "Vjedhje e kryer në bashkëpunim". Rasti në fjalë çon në rreth 20 persona që janë dënuar apo proceduar gjatë këtij viti me gjobë në këtë zonë industriale për vjedhje të skrapit.

Be.Dy.