Tenton t‘ia mbathë i kërkuari, plagoset shefi i krimeve

Dje nga Shërbimet e Komisariatit të Policisë Nr.4 Tiranë u krye arrestimi i shtetasit Shkëlzen Përparim Muçollari, 20 vjeç, lindur në Tropojë dhe banues në Tiranë, i dënuar më parë, për vjedhje dhe trafikim të lëndëve narkotike. Arrestimi i tij u krye sepse ishte person i shpallur në kërkim për vjedhje, në bashkëpunim më shumë se një herë. Ditën e enjte, më datë 10.12.2009, rreth orës 23:00, një grup agjentësh të sektorit kundër krimit të drogës, me në krye shefin e tyre Ervin Dalipaj, kanë shkuar në banesën e Muçollarit, por ai ka kundërshtuar me dhunë shoqërimin. Në këtë moment, pas një përplasjeje, shefi i krimeve Dalipaj është rrëzuar, duke thyer njërin krah. Policia njofton se pas ndalimit u kryen veprimet procedurale dhe materialet do t‘i kalojnë prokurorisë, për veprën penale të "vjedhjes" e kryer në bashkëpunim dhe "kundërshtimit të punonjësit të policisë", parashikuar nga nenet 134/3 dhe 236/2 të Kodit Penal.