Testet e Letërsisë, nis sot shpërndarja në katër qendrat e vlerësimit

Testet të Gjuhë-Letërsisë të plotësuara nga 33.400 maturantë, të cilat u grumbulluan në shkollën “Sabaudin Gabrani” në Tiranë, do të shpërndahen sot për korrigjim në katër qendrat e vlerësimit në: Tiranë, Elbasan, Shkodër dhe Fier. Ministria e Arsimit bën të ditur se katër qendrat e vlerësimit janë vendosur në godinën e shkollës “Sabaudin Gabrani” në Tiranë, në godinën e shkollës “Qemal Stafa” në Elbasan, në godinën e shkollës “Jordan Misja” në Shkodër dhe në godinën e Drejtorisë Arsimore Fier. Drejtoria e Arsimit Parauniversitar në MASH dhe Agjencia e Vlerësimit të Arritjeve të Nxënësve (AVA) kanë siguruar mjedise të përshtatshme dhe të sigurta për vlerësuesit e testeve. Mënyra se si do të përzgjidhen testet për t’u vlerësuar do të jetë me short, ndërkohë asnjë qendër rajonale nuk do të korrigjojë testet e rajonit të saj. Drejtoritë Arsimore Rajonale (DAR) Tiranë, Elbasan, Shkodër, Fier, kanë marrë masa për lirimin e mjediseve të korrigjimit në godinat e sipërpërmendura dhe për ruajtjen e tyre me shërbim 24-orësh me polici ose roje civile gjatë periudhës së korrigjimit të provimeve nga 10 qershor-25 korrik.

Ministria e Punës, programe për uljen e papunësisë

Ministria e Punës në zbatim të programit të qeverisë ka hartuar programet e punës për vitin në vijim, ku një ndër detyrimet kryesore të veprimtarise së saj është përmirësimi i situatës në tregun e punës. Ndërkohë uja e papunësisë me 3 për qind mbetet objektivi i vitit për këtë Ministri. Sipas Ministrisë së Punës, politikat e punësimit për këtë vit janë orientuar drejt rritjes së nivelit të punësimit afatgjatë, përmes institucionalizimit dhe formalizimit të tregut të punës, si dhe nxitjes nëpërmjet mbështetjes financiare.

11 Qershor 2008