Teuta Topi: Barazia gjinore, parakusht për zhdukjen e varfërisë

Zonja e Parë e Republikës së Shqipërisë, Teuta Topi, u shpreh gjatë punimeve të sesionit të 19-të të Forumit të Krans Montanës në Monako, se "barazia gjinore është parakusht për zhdukjen e varfërisë dhe një zhvillim të qëndrueshëm për të gjithë". Në fjalën e saj mbajtur gjatë sesionit me temë "Gruaja në jetën publike", znj. Topi theksoi se “arazia gjinore është një mjet për të luftuar varfërinë, për të forcuar demokracinë dhe për të rritur zbatimin e të drejtave të njeriut”. "Qeveria shqiptare ka ndjekur një politikë të vazhdueshme për uljen e varfërisë, ku gruaja luan një rol parësor në zbutjen e saj. Që prej vitit 2000, ka nisur dhe është konsoliduar gjithnjë e më shumë një lëvizje kombëtare për fuqizimin politik të gruas, e cila arriti të ketë impaktet e saj në ndikimin e klimës politike dhe sociale në vend, në favor të balancës gjinore", - tha znj. Topi. Sesioni i 19-të i Forumit të Krans Montanës, që po zhvillohet në Monako, në datat 26-29 qershor, po diskuton rreth çështjeve që kanë të bëjnë me barazinë gjinore në politikë, pjesëmarrjen e gruas në jetën parlamentare etj.