Ti zoti ministër do ia jepje fëmijës tënd librat e Fahri Balliut për ti lexuar?

Edhe pse mazhoranca dhe opozita miratuan me vota të përbashkëta ligjin për arsimin, sërish pati debate të forta në Kuvend që nisën që me arsimimin e vetë deputetëve dhe përfunduan me librat që lexojnë fëmijët shqiptarë. Në të vërtetë edhe pse qeveria ka premtuar një reformë të altertekstit, sërish askush nuk e respekton atë dhe librat që përdoren në shkolla përzgjidhen në mënyrë haptasi korruptive.

Në seancën e së enjtes, deputeti i PS, Erion Braçe, i bëri një pyetje ministrit të Arsimit, Myqerem Tafaj, nëse ai do pranonte që fëmija e tij të lexonte librat e Fahri Balliut, pasi ato blihen me detyrim nga shkollat.

Për 2009-10, shtëpia botuese 55 ka furnizuar më shumë se gjysmat e veprave në bibliotekat e Elbasanit dhe Korçës. Janë libra me autor Fahri Balliun, librai si Panteoni i Zi, Zonja e zezë Nexhmije Hoxha, Berisha përmes kasandrave. Po mirë o zoti Ministër, a do tia jepje fëmijëve të tu këto libra për ti lexuar, deklaroi deputeti socialist, Erjon Braçe.

Nga ana e tij, ministri Tafaj u mbrojt duke vënë në dukje faktin se janë mbi 22 ente botuese që janë në tregun e librit shkollor. Është një fond që është fituar nga mbi 30 ente botuese ai i bibliotekave.

Deputeti Taulant Balla akuzoi këshilltarin e kryeministrit Berisha, Bardhyl Musai se në kuadër të teksteve alternative, i është imponuar shkollave për të blerë librin e matematikës ku ai është bashkaautor, libër që për më tepër është publikuar nga shtëpia botuese e tij.