Topalli ‘sulmon‘ Edi Ramën

Kryetarja e Kuvendit, Jozefina Topalli, ka lëshuar sërish akuza ndaj socialistëve gjatë një vizite që ajo ka zhvilluar në Mamurras. Në një takim me banorët e kësaj zone, Topalli tha se opozita është kthyer në një korr korbash që sipas saj, vajtojnë çdo ditë duke refuzuar realitetin. "Tamam si sot një vit më parë zëdhënësi i Edi Ramës doli në Tiranë në konferencat e tyre të mërzitshme duke thënë se nuk do e pranojnë Shqipërinë, dhe nuk do i japin Shqipërisë ftesën në NATO. Pas dy ditësh Sali Berisha ishte i ulur me Xhorxh Bushin për të marrë ftesën në NATO. Përsëri zëdhënësi i Edi Ramës del dhe thotë se Shqipëria nuk do të integrohet, sepse kemi probleme me kartat e identitetit", tha Topalli. Sipas saj, "Ky është një turp, ky është papërgjegjshmëri. Janë kthyer në një korr korbash që vajtojnë çdo ditë, që refuzojnë realitetin", deklaroi kryeparlamentarja Topalli.