Topi, ngushëllon familjarët e shkrimtarit Krasniqi

Presidenti Bamir Topi, nëpërmjet një mesazhi të bërë publik sot paradite, ngushëllon familjarët e shkrimtarit të shquar shqiptar, Sulejman Krasniqi, i cili ndërroi jetë dje në Tiranë në moshën 74-vjeçare.

Në mesazhin e tij, presidenti Topi e cilëson shkrimtarin Krasniqin, njeriun e penave më të shquara të letërsisë sonë moderne, i cili me talentin e rrallë dhe krenarinë e paepur kombëtare la gjurmë të pashlyeshme në letrat shqipe të katër dekadave të fundit! “Më lejoni që t`ju shpreh ngushëllimet më të ndiera e të sinqerta!

Në këto momente të vështira për humbjen e njeriut tuaj të shtrenjtë, ndaj me ju jo vetëm hidhërimin, por edhe vlerësimin më të lartë për personalitetin e spikatur të Sulejmanit në fushën e letërsisë, për vlerat e jashtëzakonshme njerëzore si dhe për përpjekjet e angazhimin shumëvjeçar të tij në shërbim të ruajtjes e përçimit të vlerave historike kombëtare, të fitimit të lirisë së Kosovës dhe lartësimit të imazhit të kombit shqiptar”, shkruhet ndër të tjera në mesazhin ngushëllues të presidentit Topi.