Tragjedia e paralajmëruar, policia injoroi kontrollet, autobusi pati probleme

Shoqata e Ekspertëve Autoteknikë dhe Vlerësimit të Dëmeve, nëpërmjet një letërkëmbimi ka vënë në alarm Drejtorinë e Policisë së Qarkullimit Rrugor për situatën e automjeteve të transportit publik, të cilët qarkullojnë duke mos pasur sistem frenimi dhe për pasojë kanë ndodhur edhe disa aksidente. Gazeta Shqiptarja.com zbardhi sot letër-këmbimin mes drejtuesit e policisë rrugore, Vullnet Topalli dhe kryetarit të shoqatës së ekspertëve autoteknikë, Gëzim Hoxha në muajin maj.

Sipas Hoxhës, shumica e automjeteve të transportit rrugor që qarkullojnë në rrugët e vendit, nuk disponojnë frena ose sistemi i frenimit të tyre është në kushte tepër të dobëta teknike. Në shumicën e rasteve drejtuesit e këtyre automjeteve përdorin marshat për uljen e shpejtësisë, ndërsa frenat thuajse nuk i përdorin në rastet e zgjidhjes së situatave të komplikuara në rrugë. Gazeta “Shqiptarja.com” disponon të plotë këtë letërkëmbim, ku tregohet se palët bien dakord për rritjen e bashkëpunimit, por që në fakt deri tani shumë pak është bërë për evidentimin e rasteve ku mjetet e transportit lëvizin pa sistemin e frenimit.

Ndërkohë GSH raporton sot se autobusi kishte pasur probleme teknike një javë më parë, në Sarandë. Edhe ditën që ndodhi tragjedia, shoferi kishte ndaluar për të bërë rregullime në autobus.