Trazira gjatë përvjetorit të revolucionit në Iran

Me qindra mijëra ithtarë të qeverisë u tubuan sot në qendër të Teheranit, për të shënuar përvjetorin e revolucionit islamik, ndërsa forcat e sigurisë reaguan me shpejtësi, për të shpërndarë tubimet e ithtarëve të opozitës.

Policia u përlesh me protestues në disa pjesë të Teheranit, duke përdorë gaz lotsjellës, njoftuan faqet e opozitës në internet.

Me dhjetëra ithtarë të opozitës, të armatosur me shkopinj, kanë sulmuar konvojin e udhëheqësit të opozitës, Mahdi Karroubi, në momentin kur ai kishte tentuar t’i bashkohej protestave, deklaroi i biri i tij, Hossein Karroubi.

Sulmuesit, për të cilët besohej se ishin pjesëtarë të njësisë civile religjioze, Basij, dëmtuan disa automjete dhe thyen xhamin e automjetit të Karroubit, por ai nuk pësoi lëndime.

Forcat e sigurisë për një kohë të shkurtë arrestuan edhe mbesën e Ayatollah Khomeinit, arkitektit të revolucionit islamik në vitin 1979, si dhe bashkëshortin e saj.

Një numër i madh i pjesëtarëve të forcave të sigurisë, përfshirë këtu edhe pjesëtarë të Gardës Revolucionare, u pozicionuan në sheshet kryesore të Teheranit, për të parandaluar protestat e opozitës.

Manifestimet e sotme ishin një mundësi për regjimin e klerikëve në Iran që të nënvizojnë fuqinë e tyre.

Gjatë fjalimit të tij para ithtarëve të regjimit, presidenti i Iranit, Mahmoud Ahmadinejad, theksoi se Irani ka prodhuar sasinë e parë të uraniumit të pasuruar në nivel më të lartë, duke theksuar se Irani nuk do të gjunjëzohet para trysnisë së Perëndimit për të ndalur programin bërthamor të Iranit.