Tri gra të kulturës vlerësohen Qytetare Nderi
Tri femra korçare, figura të shquara të artit skenik, operistik dhe etnografisë shqiptare, janë vlerësuar nga Bashkia e Korçës me titullin “Qytetare Nderi”. Dhora Leka e ka marrë këtë titull nderi pas vdekjes për krijimtarinë muzikore dhe krijimin e traditës shqiptare të këngës partizane. E njohur si kompozitorja e parë femër, Dhora Leka ka shkruar opera, uvertura, por dhe poezi, prozë, tekste këngësh etj. Në vitin 1992, ajo ka marrë nga Presidenti titullin “Artiste e Merituar” për veprimtarinë e pasur në vite dhe kontributin që ka dhënë në artin muzikor. Një tjerë figurë e njohur e qytetit të Korçës që ka marrë titullin “Qytetar Nderi” është edhe e mirënjohura Jorgjie Truja. Ajo është vlerësuar pas vdekjes si një nga artistet që ka hedhur themelet e artit skenik, me veprimtari brilante në disa fusha të artit. Jorgjie Truja ka lënë gjurmë si këngëtare lirike, regjisore operistike në Teatrin Kombëtar të Operës dhe Baletit dhe themeluese e pedagogjisë vokale skenike. Që në vitin 1930 është njohur si e para soprano lirike, ndërkohë që ka qenë një ndër pedagoget e para të shkollës muzikore shqiptare. Andromaqi Gjergji, etnografe e shquar korçare, është një tjetër figurë e vlerësuar me titull nderi. Ajo ka përjetuar emocionet e forta kur ndryshe nga dy shoqet e saj, i është dorëzuar titulli nga ana e Bashkisë së qytetit. Në veprimtarinë e saj numërohen mbi 176 tituj monografish, referatesh, kumtesa e aktivitete shkencore brenda e jashtë vendit. Andromaqi Gjergji njihet si femra e parë shkencëtare. Ajo ka qenë një nga dëshmitaret e para të zbulimit të epitafit të Gllavenicës, që ka vlera në artin bizantin. Andromaqi Gjergji është vlerësuar si shkencëtarja korçare, anëtarja e parë femër e Akademisë së Shkencave me motivacionin për kontributin e çmuar në fushën e etnogafisë dhe artit popullor duke e bërë pjesë të etnografisë europiane dhe botërore. Krahas vlerësimit të tri figurave të njohura të këtij qyteti me titullin Emblema e Artë nga Bashkia e Korçës është vlerësuar edhe një shtetase italiane - Giana Pierdomenico, e cila është mësuese prej vitesh në qytetin e Korçës. Mësuesja e italishtes në seksionin dygjuhësh, është nderuar për kontributin që ka dhënë në marrëdhëniet mes dy popujve. Giana Pierdomenico ka marrë titullin për marrëdhëniet e mira dypalëshe dhe kontributin e saj në përhapjen e gjuhës dhe të kulturës italiane.
#