Tritan Shehu: Kush tha se i vodhëm zgjedhjet në 96-ën? Faji ishte i opozitës që i braktisi

Deputeti demokrat, Tritan Shehu, është shprehur se mazhoranca do t’i fitojë zgjedhjet e vitit 2013, duke u bazuar në perfoarmancën e saj dhe në aleancat e gjëra që do të krijojë.

Duke folur për shqiptarja.com, ai ka garantuar opozitën që s’do ketë asnjë problem në këto zgjedhje, por që s’ka munguar të akuzojë Ramën se po tenton të krijojë alibinë për zgjedhjet e 2013, pasi ka parë se e ka të sigurtë humbjen në sfidën e ardhshme elektorale.

Shehu nuk ka munguar të flasë për zgjedhjet aq të kontestuara dhe të përfolura të 26 majit të vitit 1996, për të cilat ai e ka hedhur fajin mbi opozitën socialiste, që në mënyrë të prapritur dhe në mënyrë revolucionare, sipas tij, braktisi zgjedhjet, duke krijuar probleme me to, që u pasuan një vit më vonë me rebelimin komunist, sipas Shehut.

Zgjedhjet e vitit 1996 janë konsideruar si më skandalozet në historinë pluraliste shqiptare, bazuar edhe në rekomandimet e ndërkombëtarëve. E megjithatë, Shehu mendon se ato nuk u vodhën nga PD, por u fituan në mënyrë të ndershme.