Triumf kuqezi, Skela-show

Shqipëria, falë një kryevepre “samba” të Ervin Skelës nga goditja e lirë, triumfoi 1-0 ndaj Irlandës së Veriut në “Qemal Stafa” në miqësoren e parë të vitit 2010, ndërkohë që trajneri Josip Kuzhe, vendosi një rekord personal me katër ndeshje pa humbje në po aq testime ndërkombëtare. Një fitore që mban një numër simbolik të plotë, pasi ishte e 50-ta për Shqipërinë në 238 ndeshje ndërkombëtare, përfshirë dhe ato zyrtare. Për Shqipërinë, që ka arritur vetëm 2 fitore në 9 përballje me irlandezoveriorët, e dyta rresht pas asaj të vitit 1997 (eliminatoret e Kampionatit Botëror 1998), ky është sinjal i mirë në kuadër të fushatës kualifikuese të Kampionatit Europian 2012. Gjithsesi, “djemtë e shumtë” të Kuzhes (aktivizoi 17 lojtarë në këtë takim, përveç portierit Beqaj), dhuruan një ndeshje me dy pamje, një pjesë të parë virtuoze me shumë raste dhe një të dytë tepër të lodhur, kjo dhe për shkak të terrenit të rënduar të impiantit ndërkombëtar kryeqytetas.

PJESA E PARË
Topi i parë u luajt nga Irlanda e Veriut, por momenti i parë i përket Shqipërisë. Në minutën e dytë, Klodian Duro fitoi një goditje të lirë në një distancë prej 35 metra Skela mori përsipër ekzekutimin, duke hedhur topin në zonën kundërshtare, por irlandezoveriorët e shmangin rrezikun. Një minutë më pas, një top në zonë për Bogdanin nga Agolli, i cili stërzagjet, por gjuajtje “on air” sulmuesit të Kievos përfundon butësisht në duart e Tejlorit. Në minutën e 8-të, mbrojtësi i Tiranës, Andi Lila, dha një krosim në zonë për Bogdanin, por ky i fundit nuk arriti ta shfrytëzojë topin e bukur të kavajasit. Gjatë dhjetë minutave të para, Shqipëria u përpoq më shumë nga krahët, ku u veçohen Agolli në të majtë dhe Lila në të djathtë dhe , por harkimet e tyre në përfundim të aksioneve ishin të pasakta. Ansi Agolli lëshoi një silurë nga 20 metra në minutën e 13-të, por sfera kaloi ngjitur me shtyllën pingule të portës së mbrojtur nga Tejlor i Birmingamit. Kulmi i 20 minutave të para është ekzekutim i bukur i një goditjeje të lirë nga ana e Ervin Skëlës, por portieri dhe kapitemi i Irlandës së Veriut, Majk Tejlor e devijoi në goditje këndi. Në minutën e 23-të, Majkëll O’Konor ndërhyri keq ndaj kapitenit të Shqipërisë, Altin Lala, duke u ndëshkuar me karton të verdhë nga gjyqtari boshnjak. Ervin Skela tregoi klasin e tij “ala Ronaldinjo”, duke realizuar një gol spektakolar falë një gjuajtje të kalibruar nga 25 metra, e që la të shtangur portieri Majk Tejlor në minutën e 25-të. Shqipëri-Irlandë e Veriut 1-0. Goli i 12-të i Skelës me Kombëtaren, duke barazuar Erjon Bogdanin, e duke qenë të dy vetëm dy gola larg rekordmenit absolut, Alban Bushi (14 gola). Ervin Skela është lojtari i pestë që i shënon Irlandës së Veriut, duke u bashkuar kështu me Robert Jasharin, Mehdin Zhegën, Altin Rrakllin dhe Altin Haxhin. Në minutën e 41-të, një nga mbrotësit irlandezoveriorë i dhuroi gabimisht një top Ansi Agollit, por mesfushori i Krivbasit në Ukrainë nuk ia doli të dyfishojë rezultatin për Shqipërinë. Dy minuta përpara përfundimit të fraksionit të parë, Ervin Skela i dha një asist Erjon Bogdanit, i cili po të ishte treguar një gjahtar i vërtetë golash mund ta kishte shtyrë topin në rrjetë.

PJESA E DYTË

Pjesa e dytë nisi me zëvendësimin e Erjon Bogdanit nga ana e Hamdi Salihit të Rapidit të Vjenës në vijën e parë. Pesë minuta më pas, MekGivën dhe Lila përplasen midis tyre, por kartoni i verdhë është për lojtarin shqiptar. Agolli goditi mbi traun e portës pas silurave të tij të zakonshme në ndeshjet ndërkombëtare. Në minutën e 60-të, MekGivën ekzekutoi një goditje këndi dhe Krajg rrezikoi me kokë. Sfera për fat goditi shtyllën horizontale të portës sonë. Trajneri Kuzhe e kuptoi që loja jonë nuk pati ritëm në njëzet minutat e parë të pjesës së dytë, dhe bëri dy zëvendësime njëherësh: Lala u zëvendësua nga Hyka dhe Agolli nga Lorik Cana, kapiteni i Sandërlendit. Në të 68’, Lorik Cana goditi bukur me kokë nga jashtë zone, por Tejlor reagoi mirë. Në të 70’ Hidi u bë shpëtimtari i portës, kur Shils goditi me kokë, duke konfirmuar momentet më të mira të kundërshtarëve. Tri minuta më pas, ishte shtylla pingule ajo që shpëtoi portën tonë nga goli i barazimit, duke u shndërruar në lojtarin e 12-të të Kombëtares sonë. Littël ekzekutoi nga rreth 30 metra një goditje të lirë, por sfera përfundoi ngjitur me shtyllën horizontale. Shqipëria, e lodhur në pjesën e dytë. Hyka riktheu emocionet në “Qemal Stafa”, duke rrezikuar në minutën e 78-të. Në minutën e 80-të, Kuzheja hodhi në fushë Emiljano Vilën në vend të Ervin Skelës, i përcjellë nën duartrokitjet e tifozëve. Kuzhe hodhi në fushë edhe sulmuesin e fundit të thirrur, Edmond Kapllanin (në vend të Bulkut), por vija e parë gjithsesi mbeti e zbehtë. Gjithsesi, një fitore e bukur e Shqipërisë që në katër ndeshjet e miqësore nën drejtimin e Josip Kuzhesë ka njohur dy fitore dhe dy barazime.

SHQIPËRI- IRLANDA E VERIUT 1-0
03.03.2010, “Qemal Stafa”, Tiranë
Shënues: Ervin Skela 25’

SHQIPËRIA: Hidi, Lila, Dallku, Vangjeli, Angolli (63’ Cana), Lala (63’ Hyka), Curri, Bulku (84’ Kapllani), Duro (74’ Bakaj), Skela (80’ Vila), Bogdani (46’ Salihi). Trajner Josip Kuzhe. Në stol, i papërdorur: Beqaj.

IRLANDA E VERIUT: Taylor, Little, McGivern, McCartney, Craigan, O'Connor, McGinn, Davis, Healy, Lafferty, McCann. Trajner: Najxhël Uorthington. Në stol: Tuffey, Carson, Kirk, Shiels, Patterson, Evans.

NDESHJE NË TOTAL KOMBËTARJA

Ndeshje Fitore Barazim Humbje Golat
238 50 50 138 209-417

Kuzhe: “Jam i lumtur për fitoren”

“Jam shumë i lumtur për fitoren”, - tha trajneri Josip Kuzhe pas fitores së bukur me Irlandën e Veriut. “Bëmë një pjesë të parë të shkëlqyer. E kuptoj lodhjen e ekipit në pjesën e dytë, kjo edhe për shkak të terrenit. Gjithsesi, ishim të mirëorganizuar”. Natyrisht që jam kënaqur. Kisha një vit pa luajtur me kombëtaren. Terreni është i keq, por në pjesën e parë bëmë një ndeshje vërtet të mirë”, - tha Lala pas ndeshjes. “Goli i shkëlqyer? Pjesën e parë luajtëm një futboll të bukur. Fusha ishte shumë e keqe. Kundërshtari na vuri në presion. Bëmë një lojë të bukur, por e rëndësishme ishte fitorja”, - tha Skela.

BILANCI ME IRLANDËN E VERIUT

07.05.1965, Belfast
Irlandë V.-Shqipëri 4-1
Trajner: Zyber Konçi
Shënues: Robert Jashari
El.KB 1966

24.11.1965, Tiranë
Shqipëri-Irlandë V. 1-1
Trajner: Loro Boriçi
Shënues: Mehdin Zhega
El.KB 1966

15.12.1982, Tiranë
Shqipëri-Irlandë V. 0-0
Trajner: Shyqyri Rreli
El.Euro 1984

27.04.1983, Belfast
Irlandë V.-Shqipëri 1-0
Trajner: Shyqyri Rreli
El.Euro 1984

09.09.1992, Belfast
Irlandë V.-Shqipëri 3-0
Trajner: Bejkush Birçe
El.KB 1994

17.02.1993, Tirana
Shqipëri-Irlandë V. 1-2
Trajner: Bejkush Birçe
Shënues: Altin Rraklli
El.KB 1994

14.12.1996, Belfast
Irlandë V.-Shqipëri 2-0
Trajner: Astrit Hafizi
El.KB 1998

10.09.1997, Zyrih
Shqipëri-Irlandë V. 1-0
Trajner: Astrit Hafizi
Shënues: Altin Haxhi
El.KB 1998

03.10.2010, Tiranë
Shqipëri-Irlandë V. 1-0
Trajner: Astrit Hafizi
Shënues: Ervin Skela
Miqësore

Bilanci: 9 ndeshje; 2 fitore, 2 barazime, 5 humbje. Golaverazhi: 5-13. Golashënuesit e Shqipërisë: Robert Jashari, Mehdin Zhega Altin Rraklli, Altin Haxhi, Ervin Skela.

SHQIPËRIA ME KUZHENË

ZYRTARE
Shqipëri-Portugali 1-2
Shqipëri-Danimarkë 1-1
Suedi-Shqipëri 4-1

MIQËSORE
Shqipëri-Gjeorgji 1-1
Shqipëri-Qipro 6-1
Estoni-Shqipëri 0-0
Shqipëri-Irlandë e Veriut 1-0
Bilanci: 7 ndeshje; 2 fitore, 3 barazime, 2 humbje. Golaverazhi: 11-9

FIFA, Shqipëria ngjit një vend

Shqipëria u ngjit një vend në renditjen botërore mujore të FIFA-s, duke u pozicionuar për muajin mars 2010 në vendin e 96-të me 335 pikë. Skocia, kundërshtari i Shqipërisë në miqësoren e 3 marsit nuk lëvizi asnjë vend, duke qenë sërish në vendin e 40-të.

GRUPI D
Përsa u përket kundërshtarëve tanë në eliminatoret e Kampionatit Europian, Franca ndodhet në Top-10 më të mirat e botës, duke u renditur e 7-ta (nuk la lëvizur asnjë pozicion në krahasim me një muaj më parë). Rumania, kundërshtari ynë i parë zyrtar, ndodhet në vendin e 36-të (+2 vende), Bosnja në të 49-n (-1), Bjellorusia në të 79-n (+1) dhe Luksemburgu në vendin e 126-të (+2 vende).

TOP-10
Ndërsa Greqia është mbërthyer nga një krizë e jashtëzakonshme financiare, “gjendje lufte”, e përkufizoi kryeministri Jorgos Papandreu, Kombëtarja helene e futbollit u rikthye në Top-10 në
në renditjen e FIFA-s për muajin mars 2010, pas Argjentinës. Spanja vazhdon “mbretërimin” në botë, ndërsa Brazili dhe Holanda ndajnë podiumin në vendet 2 dhe 3. Gjermania dhe Anglia gjithashtu u ngjitën respektivisht nga një vend, përkatësisht në pozicionin 5 dhe 8.

Top-10

1 Spanja 1642 0
2 Brazili 1594 0
3 Holanda 1324 0
4 Itali 1226 0
5 Gjermania 1208 1
6 Portugalia 1201 -1
7 France 1171 0
8 Anglia 1109 1
9 Argjentina 1087 -1
10 Greqi 1074 2

GRUPI D ELIMINATOR
7 Franca 1171 0
36 Rumania 774 2
49 Bosnja 644 -1
79 Bjellorusia 400 1
96 Albania 335 1
126 Luksemburgu 196 -2

Dinamo, leksion “alla Federer” Shpresave

Dinamo, lideri i Kategorisë Superiore, i dha një leksion tip “Roxher Federer” Kombëtares U-21, në miqësoren e fituar me rezultatin tenistik 6-2. Për blutë e Shkëlqim Muçës shënuan me radhë Ferraj, Sefa (2), Hamzallari, Tirmanaro(2). Për Shpresat e drejtuara nga Ramadan Shehu realizoi sulmuesi i Besës së Kavajës, Sokol Cikalleshi.

Lushnja, hap fals me Pogradecin

Lushnja hodhi një gjysmëhapi fals në kampionat pas barazimit 1-1 me Pogradecin në Korçë, në takimin përmbyllës së javës të 20-të të Kategorisë së Parë. Ndeshja ishte shumë e tensionuar dhe të dyja skuadrat i mbyllën 90 minutat me nga një lojtar më pak.
Nezhat Drazhani realizoi në minutën e 7-të për Pogradecin e Ylli Çekiçit, ndërkohë që goli i barazimit për verdhejeshilët e Artan Banos mban firmën e Klodian Arbërit nga pika e bardhe, dy minuta përpara përfundimit të kohës së rregullt. Gjyqtari Kreshnik Hakrama ndëshkoi me kartonin e kuq Galicën e Pogradecit dhe zëvendësuesin Cenko të Lushnjës. Edhe në fazën e parë në “Roza Haxhiu” takimi kishte përfunduar po 1-1. Pas këtij barazimi, Lushnja (39 pikë) e sheh veten me dy pikë më pak se Elbasani i vendit të dytë, 41, dhe 11 pikë më pak se Bylisi kryesues (50 pikë), duke ndjerë nga afër presionin e Adës së vendit të katërt (37 pikë).

4 Mars 2010