Trupa ushtarake italiane tranzit përmes Shqipërisë

Këshilli i Ministrave miratoi ditën e djeshme vendimin për lejimin e kalimit tranzit të disa trupave ushtarake italiane përmes territorit të Republikës së Shqipërisë. Ky vendim merret me propozimin e ministrit të Mbrojtjes dhe në mbështetje të Nenit 100 të Kushtetutës, si dhe të ligjit “Për mënyrën dhe procedurat e vendosjes dhe kalimit të forcave ushtarake të huaja në territorin e Republikës së Shqipërisë dhe për dërgimin e forcave ushtarake shqiptare jashtë vendit”. Vendimi parashikon lejimin e kalimit tranzit përmes territorit të Republikës së Shqipërisë të katër konvojeve ushtarake italiane, nga të cilat konvoji i parë me 16 automjete dhe 32 trupa, konvoji i dytë me 16 automjete dhe 32 trupa, konvoji i tretë me 10 automjete dhe 20 trupa, si dhe konvoji i katërt me 13 automjete dhe 26 trupa, në itinerarin Qafë Thanë-Durrës, më datën 1 mars 2008. Gjatë itinerarit të lëvizjes, trupat dhe automjetet italiane do të shoqërohen nga njësi të armatosura të Forcave të Armatosura të Republikës së Shqipërisë.

28 Shkurt 2008