Tryeza e opozitës, ja pikat e diskutimit
TIRANË- Opozita do të vazhdojë misionin e saj të luftës parlamentare në mbrojtje të demokracisë dhe pavarësisë së institucioneve. Ky ka qenë mendimi që ka mbizotëruar dje gjatë tryezës së parë opozitare për këtë vit, ku përveç partive të majta ka marrë pjesë edhe Partia Bashkimi për të Drejtat e Njeriut, të Vangjel Dules. Krerët opozitarë kanë qenë pothuajse në një zë kundër ultimatumit të Lëvizjes Socialiste për Integrim, për largim me çdo kusht të kryeministrit Berisha, duke aplikuar nëse do të ishte nevoja edhe bojkotin e Kuvendit, ndërkohë që kanë vlerësuar se koordinimi opozitar mbetet jetik për ruajtjen e pavarësisë së drejtësisë dhe garantimin e standardeve të sigurisë në vend.
Takimi
“Takim Pozitiv”. Kështu e kanë cilësuar pothuajse të gjithë krerët e opozitës takimin e parë midis tyre pas një periudhe të gjatë mosmarrëveshjesh, pavarësisht se nuk kanë mundur që të përfarojnë qëndrimet për një sërë çështjesh që lidhen kryesisht me garantimin e sigurisë dhe drejtësisë. Pasojat e ndërprerjes së marrëdhënieve mes këtyre forcave për një kohë të gjatë janë reflektuar edhe gjatë bisedës së djeshme, ku janë vënë re qëndrime deri diku diametralisht të kundërta, sidomos mes kreut të PS-së, Edi Rama dhe homologut të tij të LSI-së, Ilir Meta. Mënyra e largimit të kryeministrit Berisha dhe projektligji për Prokurorinë kanë qenë dy çështjet për të cilat dy aleatët kanë pasur dallime thelbësore në qëndrimet e tyre. Ndërsa Meta ka vendosur si kusht për vijimin e komunikimit ndëropozitar largimin me çdo mjet të kryeministrit Berisha, qoftë edhe nëpërmjet ndërprerjes së marrëdhënieve institucionale me Kuvendin, kryesocialisti Rama, megjithëse ka vlerësuar si thelbësore largimin e tij, ka theksuar se kjo nuk mund të jetë një qëllim në vetvete. Siç mësohet nga burime pranë këtij takimi, kreu socialist ka theksuar se e rëndësishme për momentin është mbrojtja nga opozita e institucioneve të drejtësisë nëpërmjet një organizimi dhe koordinimi më të mirë midis partive që e përbëjnë këtë spektër për të detyruar mazhorancën që të heqë dorë nga kapja e këtyre institucioneve, qëndrim për të cilin Rama mësohet të ketë marrë edhe mbështetjen e aleatëve të tjerë. Ndërkohë një çështje tjetër për të cilën nuk është gjendur gjuha e përbashkët ka qenë edhe projektligji për organin e akuzës. Edhe për këtë çështje, PS ka këmbëngulur në kërkesën e saj drejtuar edhe mazhorancës për të ribërë nga e para një projektligj të ri që të garantojë pavarësinë e punës së tij, ndërsa LSI ka vlerësuar se projekti i hartuar nga Ministria e Drejtësisë për të qenë i pranueshëm, do t’i mjaftonin vetëm disa amendime, ku të përcaktohej kryesisht mandati i Kryeprokurores.
Vendimet
Pavarësisht dallimeve që janë vërejtur gjatë bisedës, tryeza e opozitës, pa përjashtuar as LSI-në, e cila në pjesën më të madhe të mbledhjes është përfaqësuar vetëm nga kryetari i grupit, Pëllumb Xhufi (Meta është larguar i pari nga takimi për shkak të një problemi familjar), ka arritur që të përfundojë në disa vendime të rëndësishme që kanë të bëjnë me vijueshmërinë e komunikimit ndëropozitar. Një ndër vendimet kryesore të kësaj tryeze ishte institucionalizimi i bashkëpunimit të mëtejshëm midis grupeve parlamentare të opozitës për të gjitha çështjet madhore që do të diskutohen në Kuvend dhe që kanë lidhje kryesisht me sigurinë dhe drejtësinë në vend. Gjithashtu krerët e partive pjesëmarrëse kanë rënë dakord që të mbështesin protestën e ditës së nesërme për drejtësinë dhe sigurinë në vend. Ndërkohë që është lënë i hapur edhe mundësia e ndërmarrjes së një mocioni mosbesimi ndaj kryeministrit Sali Berisha. Për këtë çështje është lënë që të merret një vendim i mëvonshëm kryesisht nga krerët e grupeve parlamentare. Në rast se një mocion i tillë do të ketë sukses, atëherë opozita nuk do të kërkojë zgjedhje të parakohshme, por një qeveri teknike që mund të garantojë zgjedhjet e lira dhe të ndershme.
Pikat e arritura dje gjatë takimit
Institucionalizimi i bashkëpunimit të mëtejshëm midis grupeve parlamentare të opozitës për të gjitha çështjet madhore që do të diskutohen në Kuvend.
Partitë bien dakord të mbështesin protestën e ditës së nesërme (sotme) për drejtësinë dhe sigurinë në vend.
Lihet e hapur mundësia e ndërmarrjes së një mocioni mosbesimi ndaj kryeministrit Sali Berisha.
Pikat ku nuk u ra dakord
PS këmbëngul në ribërjen nga e para të draftit për prokurorinë, ndërsa LSI kërkon vetëm disa amendime.
LSI vendos si kusht largimin me çdo mjet të Kryeministrit, ndërsa PS edhe pse vlerëson si thelbësore largimin e tij, konsideron se s’mund të kthehet në qëllim në vetvete.