Turizmi malor, 20% më shumë turistë të huaj në 2011

Turistët e huaj që preferojnë turizmin malor kanë qenë më të shumtë në numër këtë vit, në krahasim me të njëjtën periudhë të një viti më parë. Agjencitë turistike, të cilat zhvillojnë turizmin (incomeing) në kryeqytet, raportojnë 20% më shumë turistë të huaj këtë periudhë krahasuar me vitin e kaluar.

Turizmi malor shqiptar po preferohet gjithmonë e më shumë, jo vetëm nga vendasit, por edhe të huajt. Ndërsa agjencitë në kryeqytet raportojnë se ky sektor turistik është rritur me 50% këtë vit dhe 20% janë rritur prurjet turistike të huaja. Sipas tyre, zhvillimi i turizmit malor, promovimi nga ana e qeverisë dhe sajteve të huaja të bukurisë malore shqiptare, kanë nxitur një numër të konsiderueshëm turistësh të huaj të kërkojnë paketa turistike për të vizituar Alpet tona, zonën e Voskopojës, Valbonës dhe Thethit. “Paketat tona turistike janë me çmime të arsyeshme edhe për turistët e huaj që kontaktojnë nëpërmjet faqeve tona të internetit. Një fundjavë varion nga 60 në 90 euro për person, ku përfshihet përfshihen; udhëtimi me autobus, trageti për të përshkuar liqenin e Fierzës, hoteli për dy net me vaktin e mëngjesit. Gjithashtu edhe për udhëtimin drejt Thethit në paketën 60 euro për person, përfshihen udhëtimi, fjetja në shtëpizat e bujtjes dhe ngrënia”, - shprehet një agjente turistike. Ajo tregon se ka turistë që vijnë nga Italia, Greqia, vendet e tjera të rajonit, por ka edhe turq .Në këtë mënyrë, turizmi malor në Shqipëri vlerësohet si një nga resurset turistike më të mëdha të vendit, krahas bregdetit, duke tërhequr gjithmonë e më shumë vizitorë. “Përmirësimi i infrastrukturës, sigurisë dhe investimet në këtë sektor janë rritur gjatë viteve të fundit, duke shtuar të ardhurat për banorët, kështu që ata mendojnë edhe për pushime. Qytetarët shqiptarë kanë nisur fundjavat dimërore në mal. Ne kemi shumë kërkesa për në zonat e Thethit dhe të Valbonës. Ky vit ka shënuar 50 % më shumë turistë për zonën malore të Shqipërisë dhe 20% të tyre e kanë përbërë turistët e huaj”, - u shpreh agjentja turistike. Gjithashtu, turistët e huaj sipas saj janë mahnitur edhe me Lurën dhe kanionet e Osumit. Sipas agjentëve, të huajt tërhiqen nga klima dhe bukuria e natyrës shqiptare. Sipas agjentëve turistikë, ka turistë të huaj që kanë ardhur familjarisht disa herë për të pushuar me paketa në Shqipëri. Në tetë muajt e këtij viti, sipas statistikave zyrtare, Shqipëria është vizituar nga 2 milionë e 100 mijë turistë, 300 mijë më shumë se vitin e kaluar. Por, ende sot e kësaj dite nga institucionet nuk publikohen shifra për të ardhurat nga turizmi. Ndërsa qeveria ka gati ligjin, i cili parashikon për 8 vjet taksë zero për ata që investojnë në turizmin malor.