Turizmi shqiptar paguan taksën e TVSH-së më të lartë në rajon

Pavarësisht se jemi tre muaj larg fillimit të sezonit turistik veror, operatorët privatë ngrenë shqetësimin për masat që duhet të marrë qeveria. Duke marrë si shembull vendet e tjera që lagen nga deti Adriatik dhe ai Mesdhe, me të cilat Shqipëria përpiqet të bëjë konkurrencë, vihet re niveli i ulët i taksës së Tatimit mbi Vlerën e Shtuar (TVSh). “Aktualisht bizneset shqiptare te hotelerisë dhe restoranteve, që aplikojnë regjimin e TVSH-së, nuk mund të thuhet se ofrojnë shërbime me çmime konkurruese për të njëjtën cilësi shërbimi krahasuar me fqinjët apo vendet e tjera europiane”, thotë Jak Topuzi, President i Sektorit të Akomodimit, në Shoqatën Shqiptare të Turizmit.

Aktualisht, taksa e TVSh-së prej 20 për qind në Shqipëri, për çmim dhome, krahasuar me Turqinë (8 për qind), Greqinë (6-9 për qind), Malin e Zi (7 për qind), Italinë (10 për qind), Francën (5.5 për qind), Maltën (5 për qind) etj., është 200-400 për qind më e lartë.

Krahas TVSh-së, taksat lokale si 5 për qind e çmimit të fjetjes në hotel, pagesat relativisht të larta të transaksioneve bankare (komisioni për kartat e kreditit 2-4.5 për qind), çmimi i energjisë elektrike, karburantit për ngrohje etj., e bëjnë sektorin e hoteleve të diskriminuar. E njëjta situatë paraqitet dhe me restorantet.

“Pjesë e politikave mbështetëse e qeverisë për industrinë turistike, duhet të jetë dhe rishikimi i nivelit të TVSh-së për hotelet dhe restorantet. Argumentimet për një TVSH të reduktuar për hotelet dhe restorantet në Shqipëri bazohen në praktikën që po ndjek BE-ja për sistemin e TVSh-së së reduktuar në vendet anëtare të saj”, thotë Topuzi. Prej vitesh hotelet e tashmë edhe restorantet në vendet e BE-së, sipas direktivave të Komisionit Europian (Direktivës 2006/112/EC), kane mundësinë te jene subjekt i TVSh-së reduktuar, (20 nga 27 vendet e BE-së kanë një TVSh më të vogël ose baras me 10 për qind për hotelet, kryesisht ato të Mesdheut). Sipas Shoqatës së Operatorëve Turistikë, takimi i Këshillit Europian për Heshtjet e Ekonomisë dhe Financave në Bruksel më 10 mars 2009 u ka dhënë dritën jeshile shteteve anëtare të aplikojnë TVSh-në e reduktuar dhe për sektorin e restoranteve.

Sipas Topuzit, niveli i çmimeve të hoteleve është faktor vendimtar i konkurrueshmërisë së destinacioneve turistike. Mjaft shtete mesdhetare ndjekin politika mbështetëse për sektorin e turizmit përfshi dhe ato fiskale.