Turqi: Kurdët e fillojnë tërheqjen për në bazat në Irak

Kryengritësit kurdë kanë konfirmuar sot se prej nesër fillon tërheqja e tyre nga Turqia, për në bazat në pjesën veriore të Irakut.

Partia Punëtore e Kurdistanit, e njohur me shkurtesën PPK, në muajin Mars të këtij viti e ka shpallur armëpushimin dhe ka premtuar tërheqjen e luftëtarëve të vet nga Turqia, si pjesë e bisedimeve paqësore, që synojnë përfundimin e konfliktit gati 30 vjeçar, nga i cili janë vrarë dhjetëra mijëra njerëz.

PPK ka luftuar për autonomi në Turqi, transmeton Rel.

Ky grup, në njoftimin e sotëm, thotë se kontigjenti i parë i forcave të veta do të tërhiqet nesër nga Turqia dhe do të vendoset në bazat në pjesën veriore të Irakut. Kjo tërheqje do të zgjasë një javë.

Turqia dhe PPK-ja kanë thënë se tërheqja do të bëhet në mënyrë të qetë dhe pa publicitet.

Parashihet që tërheqja e plotë e kryengritësve kurdë do të zgjasë afro katër muaj./Indeksonline/