U arrestua për korrupsion, “arrest shtëpie” për pedagogun e Elbasanit

Gjykata e Elbasanit ka dhënë sot masën “Arrest në shtëpi” për pedagogun Pëllumb Kllogjeri, pas akuzave për shpërdorim detyre dhe marrje ryshfeti. Kllogjeri u akuzua pas një hetimi të zhvilluar nga seksioni i krimit ekonomik pranë Drejtorisë së Policisë Elbasan.

Prokurori i çështjes Alfred Shehu ka kërkuar masën arrest me burg për Pellumb Kllogjerin pasi sipas tij vepra penale e kryer nga profesori prish imazhin e të gjithë stafit të universitetit të Elbasanit.

Nga ana e tij, profesori i Universitetit “Aleksandër Xhuvani” ka deklaruar se zarfet në fletoret e studentëve janë vendosur pa dijeninë e tij. Kjo ka qenë edhe strategjia mbrojtëse e avokatit të tij, Altin Ago, sot në gjykate.

Pedagogu do të qëndrojë në arrest shtëpie deri në përfundim të hetimeve në ngarkim te tij.