UKRAINË – Gjashtë të vrarë pas sulmeve ruse me rreth 430 dronë dhe raketa

KIEV, 14 nëntor /ATSH-DPA/ – Rusia ka përdorur rreth 430 dronë dhe raketa, në një seri të re sulmesh vdekjeprurëse gjatë natës mbi Ukrainën, përfshirë kryeqytetin Kiev, njoftuan  sot zyrtarët ukrainas.

Të paktën katër persona u vranë dhe 30 të tjerë u plagosën në kryeqytet, sipas administratorit ushtarak Tymur Tkachenko.

Pesëmbëdhjetë nga të plagosurit po trajtohen në spital.

Edhe ambasada e Azerbajxhanit në kryeqytet u godit nga mbeturinat e një rakete.

Duke shkruar në Telegram, kryebashkiaku i Kievit, Vitali Klitschko, raportoi dëmtime në shumë ndërtesa banimi dhe disa zjarre.

“Si pasojë e dëmtimit të rrjetit të ngrohjes qendrore, furnizimi me ngrohje u ndërpre pjesërisht”, tha ai.

Sipas guvernatorit Oleh Kiper, në rajonin e Odesës, dy persona u vranë dhe shtatë u plagosën.

Presidenti ukrainas Volodymyr Zelensky e përshkroi sulmin në rrjetet sociale si një “sulm të fshehtë” ndaj infrastrukturës civile dhe publikoi foto dhe video që tregojnë shtëpi të dëmtuara rëndë.

Zelensky kërkoi më shumë sanksione ndaj Rusisë.

“Ukraina gjithashtu ka nevojë të forcojë mbrojtjen ajrore me sisteme dhe raketa interceptuese shtesë, duke përsëritur një kërkesë të gjatë ndaj mbështetësve ushtarakë perëndimorë të vendit”, tha ai./   /Ad.Ab./