Udhërrëfyesi gjatë javëve në vijim
Raportuesja, Lunaçek u ka thënë studentëve se është në duart e tyre që të ndërtojnë Kosovën.
Për më tepër, ajo ka shtuar se në Parlamentin Evropian është e përkushtuar që së bashku me shumë koleg, ta sjell Kosovën dhe tërë pjesën tjetër të Ballkanit Perëndimor më afër Bashkimit Evropian.
Ajo ka ripërsëritur premtimin e saj se Kosovës, gjatë javëve në vijim, do t’i dorëzohet udhërrëfyesi për liberalizimin e vizave.
“Sigurisht se ne flasim për liberalizimin e vizave për ju, flasim për të drejtën tuaj për të udhëtuar në të gjitha pjesët e Bashkimit Evropian posaçërisht për ju si të rinj dhe është e rëndësishme në këtë kontekst dhe në kontekstin e udhërrëfyesit për liberalizimin e vizave të cilin vendi I juaj do të marr në të ardhmen e afërt në javët në vijim. Kjo është me rëndësi për vendin tuaj ashtu edhe për Bashkimin Evropian. Të jeni të sigurt se ne si Parlament Evropian luftojmë për të drejtat tuaja që ju të udhëtoni lirshëm në Bashkimin Evropian, ashtu si bëjnë gjithë qytetarët tjerët të Ballkanit Perëndimor”, ka theksuar Lunaçek.
Nga ana tjetër, kryetari i Komisionit për Integrime Evropiane në Kuvendin e Kosovës, Lutfi Haziri ka thënë se gjatë këtyre viteve Kosova nuk ka humbur kohë, por ka humbur mundësi për t’u integruar, ashtu siç kanë bërë shtetet tjera në rajon.
“Praktikisht, 12 vite të integrimeve evropiane nuk janë kohë e humbur, por janë mundësi e humbur për Kosovën, sepse shumë shtete këto 12 vite që lamë pas, edhe fqinjët tanë kanë evoluar shumë në proces. Por ka edhe shtete që kanë hyrë në këtë proces siç është rasti i fundit i Kroacisë i cili përkundër që ka pas 10 vite negociata të rënda, të vështira me vendime jashtëzakonisht të dhimbshme procesin e ka mbërri”, ka theksuar Haziri.
Për më tepër, ai ka shtuar se Kosova e ka një qartësi shumë më të madhe nga 2 dhjetori i vitit të kaluar sa i përket integrimeve evropiane. Sipas tij, Kosova po hynë në pritjet e ditëve të fundit për marrjen e udhërrëfyesit për liberalizim të vizave.
Ndërkohë, për mundësin e zgjatjes së kohës edhe për një muaj a po dy, Haziri ka thënë se duhet të ketë durim, pasi që, siç ka thënë ai, udhërrëfyesi si dokument nuk e zgjidh problemin dhe se ai është vetëm një dokument për Qeverinë dhe Parlamentin se çfarë detyra kanë për të kryer që të mund ta fitojnë këtë të drejtë.
Nga ana tjetër, zëvendësministri i Integrimeve Evropiane, Gëzim Kasapolli ka thënë se Kosovës gjithmonë i janë vënë detyra shtesë, për dallim prej shteteve tjera të rajonit.
“Në qoftë se vendet e tjera të Ballkanit Perëndimor kanë ecur për një proces normal, neve gjithmonë na është dashur të mendojmë për zgjidhje kreative apo për një mendim jashtë kutisë me qëllim që të mos vonohemi në këtë proces apo ndonjëherë të marrim hapa të njëanshëm me qëllim të realizimit të objektivave tona”, ka theksuar Kasapolli.
Madje, ai ka thënë se është përgjegjësi e të gjithëve realizimi i objektives evropiane për shkak se në fund të fundit të gjithë duhet të japin kontributin e vet. /kosovapress/