Uidhers ironizon Berishën: Kryeminsri, nje perralle e pangopur

Vetëm pak orë para miratimit në Kuvend të projektligjit për hapjen e dosjeve, ambasadori amerikan, Xhon Uidhers, ka preferuar t’i dërgojë një mesazh kryeministrit Berisha. Por mënyra për të dërguar mesazhin ka qenë metaforike, e përcjellë në formën e një përralle treguar nxënësve të shkollës 9-vjeçare “Fan Noli”, në të cilën ambasadori amerikan zhvilloi një vizitë gjatë ditës së djeshme. “Një ditë të diel, sapo dielli lindi, doli një krimb i vogël dhe hëngri të hënën një mollë, por nuk u ngop. Ditën e martë krimbi doli sërish dhe hëngri dy dardha, dhe sërish nuk u ngop. Ditën e mërkurë krimbi hëngri tre kumbulla, dhe sërish nuk u ngop. Erdhi e enjtja dhe krimbi hëngri katër luleshtrydhe, dhe sërish nuk u ngop. Të premten hëngri 8 portokaj, dhe sërish nuk u ngop. Erdhi e shtuna dhe ai hëngri një copë kek me çokollatë, një akullore, një sallam, një lëpirëse dhe një tortë me luleshtrydhe. Atë natë krimbi kishte dhimbje stomaku. Ditën tjetër ishte e diel. Por krimbi hëngri vetëm një gjethe të gjelbër dhe u ndie shumë mirë. Por nuk ishte më një krimb i vogël, por një krimb i shëndoshë. Ai ndërtoi një shtëpizë të vogël dhe pas një farë kohe e gërvishti mbulesën e tij dhe doli se ishte një flutur shumë e bukur”, - u tregoi Uidhersi fëmijëve. Një përrallë e tillë është treguar në një kohë kur kryeministri Berisha nxiste deputetët e PD-së në mbledhjen e Grupit Parlamentar që të votonin ligjin për hapjen e dosjeve, duke bërë të ditur se nuk do të dalë mbi standardet. Por ata që dinë të marrin mesazhe nga përrallat e kuptojnë qartë se qëllimi i Uidhersit ishte t’i tregonte Berishës se oreksi i madh për pushtet ka treguar në të shkuarën se dëmton stomakun e atij që kërkon të hajë shumë. Dhe se asnjëherë nuk është vonë të rikthehesh në dietë. Sidomos nëse ajo sugjerohet nga amerikanët.

23 Dhjetor 2008