VKM, zbardhen pagat e reja të policisë
Trazhgim Sokolaj
Qeveria vendos t’u japë 60 për qind të pagës së gradës nëninspektor, punonjësve të Policisë së Shtetit që pranohen në Shkollën Bazë të Policisë.
Përfitimi i masës 60 për qind të pagës së gradës nëninspektor shkon për ata punonjës që kanë përfunduar arsimin e mesëm, ndërsa përfitimi në masën 100 për qind është për punonjësit e policisë, të pranuar në Shkollën Bazë, që kanë kryer Arsimin e Lartë në një profil tjetër. Kjo është vendosur me VKM-në nr.531, datë 27 prill 2009, ndërsa vendimi i Qeverisë është botuar të premten në Fletoren Zyrtare, duke hyrë kështu zyrtarisht në fuqi. Sipas tabelës bashkëngjitur vendimit, rroga bazë për gradën nëninspektor është 336 mijë lekë të vjetra. Punonjësit e policisë të pranuar në Shkollën Bazë, që kanë përfunduar arsimin e lartë e përfitojnë atë në masën 100 për qind gjatë kryerjes së shkollës ndërsa ata punonjës të pranuar në shkollë, që kanë vetëm armimin e mesëm, përfitojnë një pagë mujore me vlerë 198 mijë lekë të vjetra. Në pikën vijuese të vendimit të Qeverisë, flitet për trajnimet e punonjësve të policisë dhe pagat që ata mund të marrin gjatë kësaj kohe. Pika 5/2 e VKM, thekson se “punonjësi i policisë mund të trajnohet brenda ose jashtë vendit në kuadër të programeve te trajnimeve të parashikuara të organizuara nga institucioni. “Kur punonjësi i Policisë së Shtetit kryen kurse shkollimi ose trajnimi brenda vendit, gjatë kohës së shkollimit/trajnimit, përfiton pagën mujore të vendit të fundit të punës, para fillimit të kursit të shkollimit/trajnimit. Pagesa bëhet nga struktura e policisë ku punonjësi ka qenë efektiv para fillimit të shkollimit/trajnimit”, thuhet më tej në vendimin e Qeverisë. Sipas tij, kur punonjësi kryen kurse shkollimi ose trajnimi jashtë vendit, për periudha deri në 6 muaj, ai merr pagën mujore të vendit të punës që ka pasur para fillimit të shkollimit/trajnimit ndërsa për periudha trajnimi mbi 6 muaj, punonjësit të policisë i ndërpritet paga, por familjes së tij i jepet shpërblim si më poshtë:
a) Për punonjësit pa ose me një pjesëtar familje në ngarkim, 40 për qind e pagës mujore.
b) Për punonjësit e policisë me më shumë se një anëtar të familjes në ngarkim, 50 për qind e pagës mujore.
Sipas vendimit të qeverisë, pagesa bëhet nga struktura e policisë, ku punonjësi ka qenë efektiv para fillimit të shkollimit/trajnimit.
Në VKM thuhet se punonjësi i Policisë së Shtetit, që nuk është efektiv me kohë të plotë në institucionet e sistemit arsimor policor, por bashkëpunon me këto institucione si punonjës i jashtëm, për çdo orë mësimore 60-minutëshe përfiton një pagë si më poshtë:
a) Në kurset e shkollimit/trajnimit për kursantët e nivelit zbatues, në masën 300 lekë në orë.
b) Për kurset e shkollimit/trajnimit për kursantët e nivelit të parë drejtues, në masën 400 lekë për orë.
c) Në kurset e shkollimit/trajnimit për kursantët e nivelit të mesëm drejtues, në masën 500 lekë për orë.
Vendimi i Qeverisë cakton se efektet financiare për pagat e parashikuara në pikat 5/1, 5/2, 5/3 të Vendimit, përballohen nga buxheti i vitit 2009 i miratuar për Policinë e Shtetit. Ndërsa sipas vendimit, efektet financiare do të përballohen edhe nga fondi për rritjen e pagave të punonjësve të Policisë së Shtetit. Në fund të vendimit, Qeveria ngarkon Ministrinë e Brendshme me zbatimin e VKM në fjalë.
Tri kategoritë që përfitojnë nga rritja e pagave
Policia: 216 kandidatë fituan të Drejtën e studimit në Shkollën Bazë
TIRANE – Të paktën 216 persona që u kualifikuan në provimet e pranimit në Shkollën Bazë të Policisë së Shtetit, pritet të përfitojnë nga vendi i fundit i Qeverisë. Vendimi në fjalë megjithatë pritet të ketë efekte edhe për punonjësit tjerë, pasi ndryshimet kanë prekur gjithë tabelën e shpërndarjes së pagave në hierarkinë e Policisë së Shtetit. Veç kësaj, përfitues të pagave të reja, do të jenë edhe punonjësit vazhdojnë Shkollën Bazë në vitin e dytë të saj, një numër ky i përafërt me 250 persona. Nga ana tjetër, përfitues nga vendimi i qeverisë, janë edhe punonjësit e të gjithë piramidës së Policisë së Shtetit, të cilët vazhdojnë detyrat e tyre, ndërsa i nënshtrohen programeve të ndryshme të trajnimit/shkollimit brenda ose jashtë vendit. Kategoria e tretë e përfituesve nga VKM është ajo e mësimdhënësve, qofshin këta punonjës të Policisë së Shtetit apo edhe pedagogë të jashtëm, që punojnë me kohë jo të plotë në Shkollën Bazë dhe në Akademinë e Policisë së Shtetit. për punonjësit e Policisë së Shtetit që vazhdojnë Shkollën Bazë, është vendosur të marrin 60 për qind të pagës së caktuar për granën nëninspektor. Kjo është grada më e ulët e nivelit zbatues, më e ulëta në hierarkinë e gradave në policisë së shtetit. Grada nëninspektor, është e para që përfiton çdo punonjës policie pas hyrjes në këtë profesion. Më pas grada ndryshon në varësi të aftësive e trajnimeve profesionale, arsimit, moshës, karrierës dhe treguesve të tjerë që vlerësohen nga një komision i posaçëm që përgjigjet për ndryshimin e gradave. Vendimi i fundit i Qeverisë, i cili ushtron efekt në tabelën e pagave të policisë, është propozuar nga Ministria e Brendshme dhe e Financave në Qeveri ndërsa më pas është miratuar duke përcaktuar se hyn ën fuqi pas botimit në Fletoren Zyrtare. Efektet financiare në pagën e punonjësve të policisë së shtetit pritet të fillojnë nga momenti i hyrjes së vendimit në fuqi e në vazhdim. Gjatë viteve të fundit pagat e policisë kanë ndryshuar dy herë si pasojë e sistemit të ri të gradave, ku është bërë rritje për çdo gradë, ndërsa disa punonjës nuk kanë përfituar, pasi janë ulur në gradë çka automatikisht ka sjellë zbritje të pagës.