Vazhdojnë garën në Europa League
Flamurtari i Vlorës është kualifikuar në rrethin e dytë të garave në Europa League. Në fakt, kuqezinjtë janë mposhtur në shtëpi të enjten në ndeshjen e dytë nga skuadra e Podgoricës, Buduçnosti, me rezultat 1:2.
Mirëpo, kjo fitore nuk u mjaftoi malazezëve për ta eliminuar ekipin shqiptar, nga i cili ishin mposhtur në ndeshjen e parë në Podgoricë me rezultat 1:3. Në pjesën e parë të ndeshjes së kthimit shqiptarët luajtën më mirë. Ata kaluan në epërsi prej 1:0 në minutën e 20-të me golin që e shënoi Ardit Shehaj.
Kurse, pjesa e dytë u takoi mysafirëve nga shteti fqinj, të cilët ia dolën ta fitojnë ndeshjen fal dy golave që i realizoi Boskovic - njërën në minutën e 72-të e tjetrën në minutën e 77-të nga penaltia. Kështu, kryeqytetasit malazezë u përshëndetën me fitore nga garat evropiane. Ekipi çek, Jablonec do të jetë sfida e radhës e Flamurtarit.
Ndërkohë, edhe skuadra tjetër shqiptare, Vllaznia është kualifikuar në rrethin e dytë të garave në Europa League. Shkodranëve u mjaftoi një barazim 1:1 në shtëpi ndaj ekipit nga Malta, Birkirkaras, për të ecur përpara. Kjo pasi shqiptarët e patën mposhtur këtë skuadër në takimin e parë në Maltë me rezultat minimal, 0:1.
Në takimin e dytë, shkodranët kanë kaluar të parët në avantazh prej 1:0 me golin që e shënoi në minutën e 4-t Vajushi. Por, mysafirët u kundërpërgjigjën në minutën e 17-të nëpërmjet Silvas, duke i barazuar shifrat në 1:1. Kualifikimin e mëtutjeshëm Vllaznia do ta kërkojë përballë ekipi zviceran Thun.
Kurse, koha e rregullt e ndeshjes mes Glentoran dhe skuadrës tjetër shqiptare nga Maqedonia, Renovës, ka përfunduar me rezultat 2:1 për irlandezët, njëjtë siç kishin fituar shqiptarët në takimin e parë në Maqedonia.
Andaj, u zhvilluan edhe 30 minuta lojë shtesë, por ekipet nuk ia dolën të shënojnë. Ndërsa, nga penaltitë më të saktë u treguan irlandezët (3:2), të cilët e eliminuan Renovën e Bylbyl Sokolit, për tu kualifikuar në rrethin e dytë të garave në Europa League.