Vazhdon dialogu Kosovë - Serbi

Në Bruksel, sot vazhdon raundi i tretë i dialogut të nisur mes Kosovës dhe Serbisë dhe në rend dite janë diskutimet lidhur me energjinë elektrike, telekomunikacionin dhe lirinë e lëvizjes.

Delegacionit të Kosovës i prin zëvendëskryeministrja Edita Tahiri ndërsa në ekipin e saj janë edhe Lirim Greiçevci- këshilltari politik i kryeministrit Thaçi, Dren Zeka - këshilltari kryesor politik i zëvendëskryeministres Tahiri, si dhe Gazmir Raci e Arjeta Rexhaj - këshilltarë politikë të zëvendëskryeministres Tahiri.

Gjithashtu në delegacionin e Kosovës marrin pjesë edhe ekspertët e fushave përkatëse, Ali Hamiti – kryesues i ZRrE-së, Fadil Ismajli-kryeshef i KOSTT-it, Arben Gjukaj-drejtor i KEK-ut, Naim Bejtullahu- anëtar i bordit të KOSTT-it, Llyr Roëlands- këshilltar në KEK, Ekrem Hoxha- kryesues i ART-së, Lulzim Kurtaj- anëtar i bordit të ART-së, Elvis Pista- PTK, Bardhyl Jashari- këshilltar i Ministrit Bajram Rexhepi, Blerim Camaj, Sabahate Muharremi dhe Shkumbim Kastrati nga Ministria e Punëve të Brendshme.

Shefi i ekipit negociator të Serbisë, Borisllav Stefanoviq, ka thënë se në raundin e tretë të bisedimeve me Prishtinën, Beogradi do të ofrojë zgjidhje të reja që janë në funksion të përmirësimit të jetës dhe mbrojtjes së interesave të serbëve në Kosovë.