Vazhdon hetimi i krimeve monstruoze në Hungari

Autoritetet në Hungari nuk kanë ofruar detaje të reja rreth krimeve monstruoze në afërsi të Budapestit, për shkak të zgjerimit të hetimeve, kanë njoftuar mediet hungareze.

Burimet e gazetës Nepsabazsag kanë theksuar se ky rast mund të ketë edhe një parahistori.

Gazeta, duke cituar një zyrtar të lartë të punëve të brendshme, tha se muri i heshtjes është i kuptueshëm, ngase bëhet fjalë për një rast mjaft të ndërlikuar.

Fillimisht u theksua se autor i këtyre krimeve është një shtetas serbë, më pas u tha se ai vjen nga rajonet e ish-Jugosllavisë, e më pas u tha se ai është shtetas i Maqedonisë.

Megjithatë, konsullata e Serbisë, duke u mbështetur në burimet e policisë, mohoi se bëhet fjalë për një shtetas serbë, e më vonë ambasada e Maqedonisë në Budapest tha se autori i këtyre veprave kriminale nuk është nga Maqedonia.

Krimi u zbulua, pasi që një i ri i plaçkitur, e më pas i futur në një vrimë dhe i mbuluar deri në kraharor, arriti të lirohet nga aty. Policia pothuajse po atë ditë arrestoi tre persona, ndërsa një javë më vonë, i akuzuari kryesor ofroi një marrëveshje.

Ai theksoi se do të zbulojë vendin ku janë varrosur disa kufoma, e që në shkëmbim ai të akuzohet vetëm për plaçkitje.

Pas informatave të marra nga ai, u zbulua varreza, në të cilën ishin varrosur katër persona.

Obduksioni pritet të qartësojë se a janë varrosur ata të gjallë.